Popular Bible Verses from Isaias 43

Share

Kitaenyo ti baro a banag nga aramidek. Mangrugin nga agparang—makitayo itan! Mangaramidak iti dalan iti let-ang; sadiay, ikkankayto kadagiti ubbog ti danum.

No aglasatka kadagiti adalem a karayan, addaakto kenka; dinakanto parmeken dagiti pakariribukam. No magnaka iti apuy, dikanto mauram; dikanto maan-ano kadagiti nakaro a pakasuotam.

Ngem kuna ti APO: “Lipatenyo dagiti napalabas a pasamak; diyo panunotenen dagiti naaramid idi un-unana.

Israel, kuna ti APO a namarsua kenka, “Saanka nga agbuteng—salaknibanka. Inawagak ti naganmo—kukuaka.

Yawatkonto dagiti nasion tapno maisalakan ti biagmo. Napategka ngamin kaniak gapu ta itan-okka ken ay-ayatenka.

Ta siak ni Yahweh a Diosmo, ti Nasantoan a Dios ti Israel a mangisalakan kenka. Yawatkonto ti Egipto tapno mawayawayaanka; yawatkonto ti Etiopia ken ti Seba.

Dika agbuteng ta addaak kenka! “Pagawidekto dagiti tattaom manipud iti kaadayoan a paset ti daya ken laud.

“Ngem siak ti Dios a mangikkat kadagiti basolmo, ket aramidek daytoy gapu iti kinadiosko. Diakton isingir dagiti basbasolmo.

“Dakayo nga Israelita, dakayo ti saksik; pinilikayo a nasion nga agserbi kaniak tapno maam-ammodak ken mamatikayo, ket maawatanyo a sisiak ti Dios. Malaksid kaniak, awan ti sabali a Dios; awan ti immun-una ngem siak, ket awanto met ti sumaruno.

“Siak ni Yahweh, siak la ti makaisalakan kadakayo.

Siak ti Dios, ket agnanayonak a Dios. Awan ti makaliklik iti pannakabalinko, awan ti makabalbaliw iti aramidko.”

Uray dagiti atap nga animal itan-okdakto; idaydayawdakto dagiti abestrus ken lobo inton pagayusek dagiti karayan iti let-ang tapno adda inumen dagiti pinilik a tattao. Isuda dagiti tattao a pinarsuak nga agpaay kaniak— ket ikankantadanto ti pakaidaydayawak!”

Bilinekto ti amianan a palubosanna ida, ibagakto iti abagatan a dina igawid ida. Palubosanyo nga agsubli dagiti tattaok manipud kadagiti adayo a daga, manipud iti amin a suli ti lubong agawidda. Isuda dagiti tattaok; pinarsuak ida tapno idaydayawdak.”

Idi un-unana, nangaramid ti APO iti dalan iti baybay, maysa a pagnaan iti nadawel a danum. Inturongna ti nabileg nga armada iti pakadadaelanna, armada a buklen dagiti lugan a pakigubat ken dagiti nagkabalio. Limnedda ket didan limmung-aw; naiddepda a kasla silaw ti pabelo!

Siak ni Yahweh, ti Nasantoan a Diosyo. Pinarsuaka, Israel, ket siak ti ariyo.”