Popular Bible Verses from Smart Guys 10

Share

Wen Da One In Charge do good tings fo peopo, He give dem plenny good stuff. He no give problem same time.

No talk too much! Bumbye you goin tell someting An peopo goin come all huhu wit you. Da guys dat tink firs befo dey open dea mout, Dey undastan real good wat dey suppose to do.

You hate somebody, Bumbye you goin beef. You get love an aloha fo somebody, No matta dey go agains you, Still yet you let um go.

You slack off, you no mo money. You work hard, you come rich.

Da kine peopo dat lissen up Wen dey get presha fo do da right ting, Dey show odda peopo how Fo make dea life come mo betta. Da kine peopo dat no like lissen Wen somebody tell dem Dey wen do someting wrong, Dey make odda peopo go da wrong way too.

Da peopo dat erytime do stuff da right way, Dey no need worry, notting bad goin happen to dem. Da peopo dat like make eryting come jam up, Erybody goin know how dey stay fo real kine.

If you get choke respeck fo Da One In Charge, So dat you stay sked wen you tink bout him, You goin live long time. But da bad peopo, Ony litto bit mo, dey mahke.

Da peopo dat stay do wass right, Da One In Charge take kea dem Fo dem no come hungry. But da peopo dat do any kine bad stuff, God stop dem So dey no can get notting dey like.

Jalike afta da hurricane hit, Trouble come, an all da bad peopo, gone awready! But da peopo dat stay pono, Dey da ones stay solid an strong, Foeva kine.