Popular Bible Verses from Teacha 7

Share

No come huhu fas, aah?! Cuz dass how da stupid guys stay inside.

So wen eryting go good, stay good inside. But wen eryting go bad, figga lidis: God make good tings an bad tings happen. Az why no mo nobody can figga wat goin happen bumbye.

Wen someting pau, az mo betta den wen start. Wen you hang in dea, az mo betta den get big head.

Get peopo all ova da world Dat do wat da Rules From God tell um fo do, But no mo even one a dem dat do wass right erytime, An no do notting bad eva.

Wen you know wat fo do erytime, Az jalike one roof ova yoa head. An money, az jalike one roof ova yoa head too. But fo know plenny stuff stay mo betta, Cuz da guy dat know wat fo do erytime, Dat goin make him stay alive long time.

If you get one good rep, az mo betta den you get good perfume. Da day you mahke stay mo betta den da day you born.

Mo betta lissen wen somebody dat know wat fo do erytime scold you. Den lissen wen da stupid guys sing.

Mo betta go visit one house wea da peopo make one funeral, Den visit one house wea dey make one party, Cuz erybody goin mahke bumbye. Good, da peopo dat stay alive tink serious kine bout dis.

Da peopo dat know wat fo do erytime like go da place wea peopo stay sad inside. But da stupid guys like go da place wea peopo ony like get good fun.