Popular Bible Verses from Hebreos 13

Share

Bi cheyaḻa' selaže'cho mechon', san cheyaḻa' soacho becho bi da' dao' da' de c̱hecho, ḻe Diosen' ba gwne' c̱he to tocho: “Bi ganḻaža' le' na' bi cuejyic̱hja' le'.”

Na' can' nac yic̱hjlaždao' Jesucriston' ṉej ṉase, ca'czen' naque' ža ṉa'aža, na' ca'czen' gaque' toḻi tocaṉe.

Da'nan' bibi de da' žebcho, na' to tocho guac ṉacho: X̱ana' Diosen' zoe' chaclene' neda'. Bi žeba' bi da' gone beṉac̱hen' neda'.

Na' cheyaḻa' soacho goncho da' güen na' cheyaḻa' gwnežjwcho con gaca'te da' saque' gwnežjwcho gaclencho beṉe' bi de c̱hegaque', ḻe chazlaže' Diosen' cate' chonxenchone' choncho ca'.

Da' ba beca'a Jesucriston' xtoḻa'chon' cheyaḻa' güe'cho yeḻa' chox̱clen c̱he Diosen' yešlale mbancho, gonxenchone' len xtiža'chon'. Ḻenṉa' da' chaclaže' Diosen' güe'chone'.

Na' le'e nšagna'le, yogo'le ḻe soa do laže'le len no'ol c̱hele o beṉe' c̱hele na' bi talenḻe beṉe' yoble, ḻe Diosen' gone' saca'zi' beṉe' chesata'lene' no'ole bi zjanac no'ol c̱hegaque' o beṉe' byo bi zjanac beṉe' c̱hegaque'.

Na' bi ganḻaže'le cheyaḻa' gwleble beṉe' za'ac zito' ližlen' beṉe' chesejnilaže' Jesucriston'. Baḻ x̱ozxta'ocho ca' cate' bosolebe' beṉe' zito' ližgaquen' bosolebe' angl beṉe' gwseḻa' Diosen' ṉeca gosacbe'ede'.

Na' ṉa'a zoa Diosen' chone' cont zoa chbezcho binḻo len xbab da' yo'o ḻo' yic̱hjlažda'ochon'. Ḻen' bec̱his bosbane' X̱ancho Jesucriston' ladjo beṉe' guat, ḻe da' blalj xc̱henen' ḻe'e yag cruzen' gwzolao chac da' cobe da' gwna Diosen' gone' gaclene' beṉe' yesejnilaže'ne'; na' gague da' te c̱he dan' gwne' gonen'. Na' da' nži'ilaže' X̱ancho Jesucriston' chio', zaca'lebde' ca to beṉe' güeye' xila' beṉe' chon da' güen juisyw len be c̱he' ca'. Na' chṉabda' Diosen' gaclene' le'e bite'tez da' chyažjele cont soale gonḻe yogo'te da' güen can' chazlažen', na' gone' cont gac yic̱hjlažda'ochon' cayaṉen' chaclaže' lagüe da' nombia'cho Jesucriston'. Ḻe gonxen Jesucriston' toḻi tocaṉe. Na' ca' gonšcaczcho.