Popular Bible Verses from Efesios 2

Share

Jesucristuchö kashqam allikunata rurar kawanantsikpaq mushuq kawëta Teyta Dios qomarquntsik. Tsënö kawanantsikpaqqa unëpita patsam destinamarquntsik.

Teyta Dios ankupäkuq karmi Jesucristuman markäkushqa salvacionta qaramashqantsik. Manam kikintsikpitatsu ni allita rurashqantsikpitatsu salvacionta tarirquntsik, sinöqa Teyta Diospitam. Tsëmi pipis alabakunqatsu: <<Allikunata rurashqäpitam Teyta Dios salvamashqa>> nir.

Tsënö këkashqapis Teyta Dios ankupäkuq karmi alläpa kuyamarquntsik. Tsëmi jutsantsik rëkur wanushqanö këkashqapis Jesucristuta wanushqanpita kawaritsimur noqantsiktapis wanushqanö kashqantsikpita kawaritsimarquntsik. Ankupäkuq këninwanmi salvamarquntsik.

Jesucristuwan kawaritsimashqantsiknömi gloriachö pëwan tätsimarquntsik.

Tsënö kaptinqa mana Israel nunakuna karpis mananam forastërunatsu këkäyanki, sinöqa Teyta Diospa wamrankunana karmi llapan salvashqan kaqkunawan tsë castallana këkäyanki. Alli cimientushqa shäritsishqa wayinömi këkäyanki. Tsë wayipa cimientunqa apostolkuna y profëtakuna yachatsiyashqankunam këkan. Jesucristunam wayipa esquïnanchö mas allin kaq maestra rumi këkan.