Popular Bible Verses from Roma 3

Share

Uburé te dawasédé hã da te 're 'manharĩ za'ra. Tahawa, te 'Re ihâimana u'âsi mono, wẽ uptabi na 're isãmra mono nhiti 're dahâimana za'ra. Tane nherẽ, tinhimizawi pese zéb zarina duré iwa'rãmi marĩ te te dawi 're awaptẽrẽ mono ãna, te 'Re ihâimana u'âsi mono hã i'uwaibaba na 're idahâimana za'ra mono na te te 're da'a'madâ'â, Cristu Zezusi te te ida'awa'âbâ u'âbâ.

'Re ihâimana u'âsi mono hã Zezu Cristu, da te dasina 're i'umnhasi za'ra mono zéb zarina si te te oto 're da'a'madâ'â, i'uwaibaba na 're idahâimana za'ra mono na hã. Ãne te 'Re ihâimana u'âsi mono hã te te 're 'manharĩ, uburé te te 're isaze za'ra mono norĩ ma hã, aimawi na tãma 're da'maihâimana mono õ wa, Zudeu na, niwamhã Zudeu'õ na.

'Re ihâimana u'âsi mono hã ma tô Cristuhu ãma tinhopru, danhimizama da te 're izata za'ra mono ne, wedepo'o nhonhi'rãmi na tidâ'âzém na, Cristu hã 're hâimana mono da, dawasédé 'Re ihâimana u'âsi mono te te da'ãma 're i'a'madâ'â mono õ zé, da te ãma 're sõpẽtẽ za'ra mono da, da te dasina 're i'umnhasi za'ra mono zéb zarina. Ãne ma tô 'Re ihâimana u'âsi mono hã 'manha, i'uwaibaba na 're ihâimana mono na sihâi'ré da. Duréihã wa'a su'u ãna ma tô 're hâimana. Tahawa dawasété nherẽ, te te dama 're arob'manharĩ pipa mono õ di. Tane nherẽ, ãhã na hã 'Re ihâimana u'âsi mono hã Cristuhu dâ'âzém na danhimizama da te 're izata za'ra mono ne, ma tô oto sihâi'ré, i'uwaibaba na 're ihâimana mono na. Ãne wa, te i'uwaibaba na 're hâimana. Te te duré 're awẽsãmri, Zezusi te te 're isaze za'ra mono norĩ hã.

Tahawa, ni'wa hã 'Re ihâimana u'âsi mono nhimiroti zahi na Mozési te te irob'ui'érézé te te 're i'a'madâ'â pese mono zéb zarina, 'Re ihâimana u'âsi mono te te oto 're 'madâ'â mono dai õ di, i'uwaibaba na 're ihâimana mono na hã. E marĩ wa. Isimiroti zahi hã taré 're hâimana mono wa, ãma 're dasiwaihu'u za'ra mono da, dawasété na 're idanomro mono na.

Ãne na Ibaihâ Iwazé pese na rob'ui'éré hã te tinha: “Ni'wa hã hâimana õ di, i'uwaibaba si te te 're i'a'manharĩ mono hã. Ni'wa hã hâimana õ di, i'rã nhimiza're hã. Duré ni'wa hã hâimana õ di, 'Re ihâimana u'âsi mono zô si 're irĩtĩ mono hã. Uburé ma tô dasina 're dapahâ za'ra, bâdâdi iwẽ nhiti. Uburé ma tô 're dasisimini za'ra. Ni'wai õ di, marĩ iwẽ te te 're i'a'manharĩ mono hã. Ni'wai õ uptabi di tô.

Ãne zarina, wa waihu'u za'ra ni, 'Re ihâimana u'âsi mono hã da te dasina 're i'umnhasi za'ra mono zéb zarina si, i'uwaibaba na 're idahâimana za'ra mono na te te 're ida'a'madâ'â mono na hã, mare di, Mozésihi nhimiroti 'rada, da te 're i'madâ'â pese za'ra mono zarina hã.

Mare uptabi di! 'Re ihâimana u'âsi mono hã te za tô sena na 're ihâimana mono na 're hâimana u'âsi, uburé dazadawa nhipese na 're danomro mono nherẽ. Ibaihâ Iwazé pese na rob'ui'éré imreme na inomro zarina, ãne ãma hã: “'Re aimreme mono wamhã, i'uwaibaba na si 're i'aihâimana mono zém na, te za da te 're aiwaihu'u za'ra. Te za duré da'ãma 're i'ai'uté mo, aiwasédé, da te ai'ãma 're nomri mono wamhã.”