Popular Bible Verses from Roma 12

Share

Ãme ti'ai ãma siwa'ru 're idahâimana za'ra mono ne 're aihâimana za'ra wa'aba mono tõ. Tazahã, ma'ãpé asi'ru waré za'ra wa'aba, 'Re ihâimana u'âsi mono, asimirosa'rata za'ra wa'wa hã wahuré te te ãma aima saprĩ za'ra wa'aba da. Ãne wap si, te za 're iwaihu'u pese za'ra wa'aba mo, 'Re ihâimana u'âsi mono te te sima 're iwẽ mono zéb zarina 're i'manharĩ za'ra wa'aba mono da hã, tô marĩ iwẽ, i'uwaibaba hã, duré te te tãma 're irowẽ zani mono hã.

Tahawa, ĩsisãnawã norĩ, 'Re ihâimana u'âsi mono wa'ãma 're isiwãrĩ za'ra mono zé isa'ẽtẽ uptabi u'âbâ, wa za ãma aiwi waptẽrẽ za'ra wa'wa, ãne: Ma'ãpé 'Re ihâimana u'âsi mono ma, wahuré aihâiba hã sõmri za'ra wa'aba, danhimizama zata na danhoprubzé ihâiba ré ne, tãma si 're romhuri za'ra wa'aba mono da, duré tãma ãma 're irowẽ zani za'ra wa'aba mono zém na zama. Ã hã tô sena na 'Re ihâimana u'âsi mono ãma 're idawata za'ra mono zé, tãma 're isõmri za'ra wa'aba mono da hã.

Rob'umnhasi sina 're i'aihâimana za'ra wa'aba mono zém na, ato sina 're aihâimana za'ra wa'aba mono. Ropire aima 're ihâimana za'ra wa'aba mono hã asimi'ẽ sina 're 'wapé za'ra wa'aba mono. Duré rowaptẽrẽ hã 're sahâri za'ra wa'aba mono tõ.

Ma'ãpé 're asi'madâ'â pese za'ra wa'aba mono, marĩ iwasédé te te ai'ãma 're ai'uté za'ra wa'aba mono tõ da. Iwa'rãmi, marĩ iwasété na ãma 're ai'uté za'ra wa'aba mono, marĩ iwẽ 're i'manharĩ za'ra wa'aba mono zém na.

Ma'ãpé 're asisawi pese za'ra wa'aba mono, asisãnawã dâ'âsina Cristuhu zazei'wai wa. Duré 're dawazé pese za'ra wa'aba mono.

'Re idazawi za'ra wa'aba mono zé hã senai'õ na aima 're hâimana za'ra wa'aba mono tõ. Ma'ãpé uburé marĩ iwasédé hã asiwi 're wẽ'õ pese za'ra wa'aba mono. Iwẽ si asima 're tété tete za'ra wa'aba mono.

Uburé aima i'manharĩ waihu'u pese zéb zarina, sada 're asapẽtẽ za'ra wa'aba mono, rowẽ sina uburé ãma dama 're aihâimana za'ra wa'aba mono da.

Ĩsisãnawã norĩ, ĩma i'asawi pese za'ra wa'aba norĩ, niwa asi'ruiwa'âbâ za'ra wa'aba tõ. 'Re ihâimana u'âsi mono si tizahizéb zarina te te dama 're arob'manharĩ pipa mono. E marĩ wa. 'Re ihâimana u'âsi mono mreme na Ibaihâ Iwazé pese na rob'ui'éré hã te te nharĩ wa, ãne: “Wa hã da'ruiwa'âbâ'wa. Wa hã wa za te ãma 're wa'rãmi.” Ãne ma tô tinha, Uburé Danhib'apito hã.

Aiwa'a na 're aihâimana za'ra wa'aba mono tõ. Tô asimi'ẽ na 're romhuri pese za'ra wa'aba mono. Duré Wanhib'apito ma 're romhuri pese za'ra wa'aba mono, aipẽ'ẽ 're ato za'ẽtẽ sina.

'Re ihâimana u'âsi mono nhimizawi pese zéb u'âbâ, Zezusihi zadawa wasu'u'wa da, ĩzô ihârâ zarina, wa aima roti za'ra wa'wa, ãne: Ma'ãpé 're asi'madâ'â ze za'ra wa'aba mono tõ, danhipai u aipire na 're aihâimana za'ra wa'aba mono newa. Tazahã, asi'madâ'â zei ãna asina 're rosa'rata za'ra wa'aba mono. Duré aihâiba mono bâ aihâimanazé 'râwi 're sarẽ za'ra wa'aba mono, 'Re ihâimana u'âsi mono asina 're i'umnhasi za'ra wa'aba mono zé, te te aima isõmri za'ra wa'aba zarina.

Marĩ iwasédé, da te aima 're 'manharĩ za'ra wa'aba mono wamhã, iwa'rãmi iwasédé dama 're 'manharĩ za'ra wa'aba mono tõ. Duré sô 're asõpré wa'aba mono, uburé dama iwẽ duré i'uwaibaba hã 're 'manharĩ za'ra wa'aba mono da.

Misi na asimirosa'rata na asiré 're aihâimana za'ra wa'aba mono. 'Râwi 're asi'madâ'â ze za'ra wa'aba mono tõ. Tazahã, dama wapu na 're ihâimana za'ra mono norĩ siré 're aihâimana za'ra wa'aba mono da, asima 're wẽ za'ra wa'aba mono. Duré 'râwi rowaihu'u pese 'wa na asi'ãma 're rosa'rata za'ra wa'aba mono tõ.

Tahawa, iwa'rãmi ãhã zarina si 're 'manharĩ za'ra wa'aba mono, Ibaihâ Iwazé pese na rob'ui'éré inomro zarina, ãne: “Asitob'ru mram na hâimana wamhã, isa tãma a na. 'Rubu na hâimana wamhã, â tãma õ na. Ãne 're 'manharĩ za'ra wa'aba mono wamhã, te za asitob'ru norĩ hã sima 're siséb za'ra.”

'Re ihâimana u'âsi mono wi, ãma 're rowaptẽrẽ za'ra wa'aba mono, marĩ iwasédé te te aima 're i'manharĩ za'ra wa'aba mono norĩ ãma, iwẽ hã te te tãma 're pisutu za'ra mono da. Tô ãma 're rowaptẽrẽ za'ra wa'aba mono, iwẽ hã te te tãma 're pisutu za'ra mono da, mare di, iwasédé te te tãma 're ipisutu za'ra mono da hã. Asima 're rowẽ za'ra wa'aba mono, te te sima 're irowẽ za'ra mono norĩ siré. Duré 're ai'ru'ru wa'aba mono, 're i'ru'ru mono norĩ siré.

Asibro hã 're po'o za'ra wa'aba mono, asiré isazei'wa norĩ ma, tiwi sô 're irowaptâ'â za'ra mono zarina. Duré asõrõwa u 're dawaibui wẽ wa'aba mono.

E marĩ wa. Uburé te misi wama 're hâimana za'ra, wahâiba hã. Misi nherẽ, wa'õtõ ahâ di. Ta norĩ hã te tinhimiromhuri imono bâ sipu'u pese na te te 're 'manharĩ za'ra. Tane duré wa norĩ hã, wa'ahâ nherẽ, simisutu misi wahâiba ne, wa 're wahâimana za'ra, Cristuhu ãma wasiré 're wahâimana za'ra mono wa. Uburé wa wasiré 're wahâimana za'ra, wanhimiromhuri imono bâ, misi wahâiba wama 're ihâimana za'ra mono ne.