Popular Bible Verses from Codosas 2

Share

Adecbidi: Esuquidistu Cun Icbo nec, quequin aid tantiabenash aidën chiacpaden nabanec bëdambuec tabadta. Adec tabadquin cute aton tapun ëquëducquiocquidën uidënash nidacbimbuen Esuquidistu tantiaquid icquin aidquio tantiaquiota. Aden Esuquidistu chuiquin ubipadquidon mibitedi tantiamepanëdash. Aid tantiaquid icquin Nuquin Papa chuiquin: Mimbi nac bëdambo iquebi, Papa, quequin Nuquin Papa chianneta.

Naden muaquidon icsambuen tantiamenushe. Abimbo tantiaquiec tabadta. Ëndenquio ambibi tantiaquin matsesën chiaid ambembi chiec onquiampicpaden nëbi icquidën Esuquidistu chuibanenquio icquin chuisho tantiashun: Nuquin Papan Chiaidpenquio chiec nec, quequin tantiata. Adembidi Mayan Icsa Satanasën icsambuen namenuen tantiamiacpadombuen aidon muaquin chiaid tantienda.

Ënden Nuquin Papan matsespenquio icquin icsambuen naic tabadec uënësacbimbuec mibitedi icpanëdac. Adquid icquin Nuquin Papan ënden: Naden nata, quequin chiaid tantienquio icquin niacquido mibitedi icpanëdac. Adquid icbuedi Esuquidistu tantiaquid yansho issun: Ubëd tabadtequid nec, queshun mimbi icsambuen naidtedi tantienquio yec bëshunquin Nuquin Papan mibitedi bëdambuen isendac. Naden icsambuen naquid cuidtequid nec, quequin chuiquin dada uaid ucacbimbuen Nuquin Papan namiacpadec nuquitedi bëdambuen ismenuec abitedishun icsambuen naid bedshunash abided cuidadec cueste napotiaidën dectanac Esuquidistu uënëspanëdash.

Matsesaid yec Nuquin Papapadquidquiobidi Esuquidistu nec. Aidëmbi abitedishun Icbombo icquin Nuquin Papan chiacpaden abi tantiaquido bëdambuen namec. Nuquin Papabëd icquido aton chuiquidobëd yec ambi namiaidobëd Mayan Icsa Satanas yec quec aidtedishun Icbombo Esuquidistu nec.

Adquid icnuc utsibon: Nadquiduidi peshun acac bëdambo ictsiash, quesho tantienda. Adembidi: Nadquid uëshënuidi aid tantiec iccuededac bëdambo ictsiash, quesho tantienda. Adembidi: Uëshë choaid usudsho isec aid tantiec cuëdëncuededac bëdambo ictsiash, quesho tantienda. Aid uëshëuidtsëqui chonoadtemaid uëshë nec, cac tantienda. Esuquidistu choabicnuc umbi chuibuedtedtsëqui Esus bëdiactsëc tantiamete nec. Esus choan aidquio tantiaquiec Aidbëd tabadtequid nendac.