Popular Bible Verses from Nén Venh Ke 14

Share

Kỹ sóg kanhkã tá vẽnh vĩ ũ mẽg mũ gé. Kỹ tóg: “tag rán nĩ, ha mẽ,” he mũ. “Ũ ag tóg ẽg Senhor ki ge kỹ nỹtĩ ki kãgter ja nĩ. Ẽn ag mỹ tóg sér tãvĩ tĩ ha,” he tóg. Kỹ Topẽ kuprĩg tóg: “hỹ,” he mũ gé. “Ag rãnhrãj kaja vég ag tóg mũgtĩ. Kỹ ag tóg ag rãnhrãj to vẽnhkán kỹ nỹtĩ ha,” he tóg.

Ũ tỹ Topẽ ki ge kỹ nỹtĩ ag jé ti to krónh ke tũg. Ag jé Topẽ tovãnh tũg, ũ tỹ Topẽ vĩ kri fig mũ ag, ũ tỹ Jesus to tar nỹtĩ ag.

Kỹ tóg prẽr mũ sir. “Topẽ hã kamẽg nĩ, ti hã to: ũn mág vỹ tỹ ti nĩ, hem nĩ,” he tóg. “Ti kurã vỹ hur jun. Ẽprã ke ag jykre tugnỹm jé tóg ke mũ ha. Ũ tỹ kanhkã mré, ga han kar kỹ, goj han mũ ẽn hã mỹ: “Topẽ vỹ tỹ ã nĩ,” hem nĩ,” he tóg, Topẽ tỹ jẽnẽ jafã ẽn ti.

Kỹ Topẽ tỹ jẽnẽ jafã ũ tóg ag nón kãtĩ mũ gé. Ẽn vỹ prẽr kỹ: “!..ẽprã ke ũ ag tóg mĩg to: topẽ vẽ, he ja nĩgte..!“ he mũ, prẽr kỹ. “!..Ti kãgrá to ag tóg: topẽ vẽ, he ja nĩgte..! Ag kakã ki ag tóg ti rá han ja nĩgte..! Ag nĩgé pãnĩ ki ag tóg ránrán kỹ nỹtĩ gé..!” he tóg. “Ẽn ag vỹ Topẽ tỹ ag to jũ jagy han venh ke mũ ha..! Kỹ tóg ag tỹ vinho kron ri ke nĩ ha..! Topẽ vỹ jũ jagy han kỹ jẽ ha..! Kỹ tóg ẽg tỹ vinho tỹ kópa fãn kỹ fẽg ẽn ri ke nĩ ha..! Ti tỹ ag to jũnh ke ti..! Topẽ tỹ vẽnh kãn kỹ jẽ to ken hã vẽ..! Ũ tỹ mĩg to: topẽ vẽ, he ja ẽn ag vỹ jagtar mág ke mũ ha..! Cordeiro rĩnve..! Pĩ ki ag tóg jagãgtar ke mũ ha..! Pó tỹ enxofre pũr nĩja ki ke gé..!” he tóg. “Ag tỹ pĩ ki jagtar mũ ẽn nĩja tóg kanhkã ra tãpry mũ ha..! Tũ' henh ke tũ ti nĩ, pĩ ẽn ti..! Ũ tỹ mĩg to: topẽ vẽ, he mũ ẽn ag vỹ vẽnhkánkán ke tũ pẽ nĩ..! Ũ tỹ ti kãgrá to: topẽ vẽ, he mũ ẽn ag kar ti..! Ũn jiji tỹ ránrán kỹ nỹtĩ ẽn ag kar ti..!“ he tóg, prẽr kỹ, Topẽ tỹ jẽnẽ jafã ũ ẽn ti.

Kỹ sóg ki ẽvãnh kỹ cordeiro ẽn ve mãn mũ. Pãnónh kri tóg jẽ nĩ, pãnónh tỹ Sião he mũ ẽn kri. Ũn e ag tóg ti mré tá nỹtĩ, ũ tỹ 144 mil (ke) ag. Cordeiro ẽn jiji tóg ag kakã ki rán kỹ nĩ, Ti jóg jiji vỹ ag ki rán kỹ nĩ gé.

Kỹ sóg Topẽ tỹ jẽnẽ jafã ũ vég mũ gé. Kanhkã krẽm tóg tẽ tĩ mũ. Kỹ tóg Topẽ vĩ ma kãtĩ mũ. Topẽ vĩ ẽn vỹ tũ' henh ke tũ nĩ. Ti tỹ ẽprã ke kar ag mỹ Topẽ vĩ tónh ke vẽ, nação kar ag mỹ, povo kar mỹ ke gé, vyr mỹ vĩ nỹtĩ kar ag mỹ ke gé.

Ti nón Topẽ tỹ jẽnẽ jafã ũ tóg jun mũ gé. Kỹ tóg: “ ẽmã tỹ Babilônia vỹ kókén kỹ nỹ ha,” he mũ. “Ẽprã ke kar to tóg vãsãn ja nĩ, Babilônia to pã'i ti, ag tỹ ti mré ag prũ tũ fag mré nỹgnỹ jé, fag tỹ ti ri ke fag mén tũ ag mré nỹgnỹ jé. Kỹ tóg vẽnh kar tỹ ti mré vinho fã pẽ kron ri ke nĩ,” he tóg.