Popular Bible Verses from Nén Venh Ke 13

Share

Ũn krĩ há ag hã tóg ti número to jykrén há han ke mũ. Ũn krĩ tũ ẽn ag pijé to jykrén ke mũ'. Ẽprã ke jiji vẽ, ti número ti, hã vỹ: 666, he mũ.

Ẽprã ke kar ag vỹ ti to: “Topẽ vẽ,” he tĩ. Ag jãvo ũ ag jygji tóg ránrán kỹ nỹtĩ, Topẽ livro ki, ũ tỹ rĩr krỹg ja tũ venh ke mũ ẽn ag. Topẽ tỹ nén ũ kar han ke to hã tóg ag jygji ránrán ja nĩgtĩ, livro ẽn ki. Cordeiro tỹ ũn jagfy ter ja ẽn ag tũ vẽ, livro ẽn ti.

Ga kã tá mĩg ẽn tóg tỹ ẽprã ke kar ag kri ke nĩ, ũn mág ag kri, ũn kãsir ag kri, ũn riko ag kri, ũn jagtar ag kri, ũ tỹ tỹ camarada nỹtĩ ag kri, ag patrão ag kri ke gé. Kỹ tóg ag kar to vãsãn mũ, ag tỹ ag pẽgja tá ag nĩgé pãnĩ ki ti jiji ránrán jé. Ag kakã ki ag tóg ti jiji ránrán mũ gé. Kỹ ũn ránrán kỹ nỹtĩ ag hã tóg nén ũ kũmpra he kỹ, nén ũ vẽne he tĩ gé inhhã. Ũn rá tũ ag vỹ nén ũ kũmpra he mãn ke tũ nĩ. Vẽnh rá tag vỹ tỹ ga kã tá mĩg ẽn jiji nĩ, ti número ti ke gé.

Topẽ tỹ ti ki ge kỹ nỹtĩ ũ ag to: “nĩgfénh kỹ ag nỹtĩnh mũ, isugrĩn,” hen kỹ ag tóg nĩgfénh kỹ nỹtĩnh mũ, vẽseja kã ki. Ti tỹ ag to: “rógro tỹ ag tóg ag kãgtén ke mũ,” hen kỹ ag tóg, rógro tỹ ag kagtén ke mũ sir. Ũ tỹ Topẽ mỹ vẽnh vin mũ ẽn ag jé to krónh ke tũg. Ag jé Topẽ tovãnh tũg.

Kỹ mĩg ũ tóg goj mág kã tá kãkutẽ mũ. Ti pir ra tóg krĩ tỹ 7 (ke) nĩ. Nĩka tỹ 10 (ke) ti nĩ gé. Ti krĩ tógfĩ tóg ti nĩka kri nỹtĩ. Kỹ ti jygji tóg ti krĩ kri ránrán kỹ nỹtĩ. Hã ra tóg tỹ Topẽ to vĩ kónãn tãvĩ nỹtĩ, ti krĩ to ránrán kỹ nỹtĩ ẽn ti.

Kỹ tóg Topẽ tỹ ũn kuprẽg mũ ag kãgtén to vãsãn mũ gé. Kỹ tóg ag tỹ hẽn ri ke mũ gé sir, goj tãn tỹ mĩg ẽn ti. Hã ra Topẽ tóg ver ti to fen nĩ. Kỹ povo kar ag, nação kar ag, pã'i krẽm ke kar ag, ũ tỹ vyr mỹ vĩ nỹtĩ ẽn ag kar vỹ mĩg ẽn vĩ hã jẽmẽg mũ.

Ti tỹ ẽg tỹ nén han vãnh tỹ hẽn ri ke hynhan kỹ tóg ẽprã ke kar mỹ ón mũ, ag tỹ ti kamẽg jé. Goj kã tá mĩg ẽn rĩnve tóg milagre tỹ hẽn ri ke hynhan mũ. Kỹ tóg ẽprã ke ag mỹ: “ag tỹ mĩg ẽn fynh mũ ra tóg ter ja tũ nĩ. Ha ti kãgrá han',” he mũ, ga kã tá mĩg ẽn ti. Kỹ tóg goj kã tá mĩg kãgrá ki hu he mũ. Kỹ tóg rĩr mũ, ti kãgrá ti. Kỹ tóg vĩ mũ gé. Kỹ tóg ũ tỹ ti to: “Topẽ vẽ,” he jãvãnh ẽn ag kãgtén kãn mũ sir, ti kãgrá rĩr jẽ ẽn ti.

Goj kã tá mĩg ẽn tóg mĩg rá ri ke nĩ. Ti pẽn tóg krĩnhpẽnufã pẽn ri ke nỹtĩ. Ti jẽnky tóg mĩg kusũg jẽnky ri ke nĩ. Kỹ mĩg fẽr ẽn tóg goj kã tá mĩg tỹ pã'i mág pẽ han mũ, ti tỹ ag nĩgja kri nĩ jé.

Goj kã tá mĩg ẽn vỹ vĩ vẽnh mỹ han jẽ nĩ. Ti vĩ tỹ tóg Topẽ kato vãsãn mũ. Kysã tỹ 42 (ke) ki tóg tar jẽ nĩ, vẽnh kar kri.

Ti krĩ ũ fynh ja ag tóg nĩ. Kỹ tóg ter kren. Hã ra tóg há' he mãn, goj kã tá mĩg ẽn ti. Ẽprã ke kar ag vỹ ti vég mũ. Kỹ tóg ag mỹ e kar tĩ. Ti vĩ kri ag tóg fig mũ.

Kỹ sóg mĩg ũ vég mũ gé. Ga kã tá tóg kãkutẽ mũ. Nĩka régre ti nĩ, cordeiro nĩka ri ke. Ti vĩ tóg hã ra mĩg fẽr ẽn vĩ ri ke nĩ. Goj kã tá mĩg ẽn rĩnve tóg ti tỹ han mũ kar hynhan tĩ, ga kã tá mĩg ti. Kỹ tóg ẽprã ke kar ag to vãsãn mũ, ag tỹ goj kã tá mĩg ẽn to: “Topẽ vẽ,” he jé, ũn ter kren mũ ẽn to.