Popular Bible Verses from Hebreu 11

Share

Topẽ ki rã to ken hã vẽ, hã vỹ: ti tỹ ẽg mỹ nén tó mũ ẽn kri nĩm, he mũ. Ti tỹ nén ũ to: “ve jé ãjag tóg ke mũ,” he mũ ẽn kri fi jé ẽg tóg ke mũ, ẽg tỹ ver vég tũ ra. Ẽg jo ke ag vỹ kri nĩm kỹ ti ki ge ja nĩgtĩ gé. Hã kỹ ag tóg Topẽ mỹ tỹ ũn há ja nỹtĩgtĩ, vãsỹ ke ag, ha mẽ.

Ẽg tỹ Topẽ ki ge tũ nỹtĩn kỹ tóg, ẽg to há nĩnh ke tũ nĩ. Ẽg tỹ Topẽ to mũ sór kỹ ẽg tóg, tag to jykrén ke mũ, ha mẽ. “Topẽ vỹ nĩ,” he jé ẽg tóg ke mũ. Kỹ ẽg tóg ti to: “ẽg tỹ ti to mũ kỹ tóg, ẽg mỹ nén ũ há ẽn nĩm ke mũ, ti tỹ ẽg mỹ nén tó ja ẽn ti,” henh ke mũ gé. Kỹ tóg ẽg mỹ han ke mũ, ha vem nĩ.

Ẽg tỹ Topẽ ki ge kỹ ẽg tóg ki kanhró nỹtĩ, ti tỹ ti vĩ tỹ ẽg tỹ nén vég mũ kar hynhan ja ti. Ti vĩ vég tũ ẽg tóg nĩgtĩ. Hã ra tóg ẽg tỹ nén vég tũ tỹ ẽg tỹ vég mũ hynhan ja nĩgtĩ, Topẽ ti. Ti vĩ tỹ tóg nén kar hynhan ja nĩgtĩ.

Abraão vỹ Topẽ ki rã kỹ nĩ ja nĩgtĩ gé. Hã kỹ tóg Topẽ vĩ kri nĩm ja nĩgtĩ. Topẽ tóg ti mỹ: “ha ga ũ ra tĩg,” he mũ. Kỹ tóg ti jamã tá kãkutẽ kỹ tĩg ja nĩ, Topẽ tỹ ti mỹ ga nĩm ke mũ ẽn ra. Ti tỹ ki kagtĩg ra tóg ra tĩg ja nĩ. Topẽ ki rã kỹ jẽ kỹ tóg, ga ẽn mĩ tĩg ja nĩgtĩ. Topẽ tỹ ti mỹ ga ẽn nĩm sór ja vẽ. Kur tỹ ĩn krẽm ẽmãn kỹ tóg, ga ẽn mĩ tĩg ja nĩgtĩ, ti kósin tỹ Isaque mré, Isaque kósin tỹ Jacó mré ke gé. Ti krẽ'krẽ ag vỹ, ti mré ga ẽn venh ke ja nỹtĩ gé, hã kỹ Topẽ tóg Abraão mỹ tó ja nĩ. Hã ra ag tóg, ver vég tũ nĩ.

Noé vỹ Topẽ ki rã kỹ nĩ ja nĩgtĩ gé. Hã kỹ Topẽ vỹ ti mỹ: “ta vỹ kutẽnh ke mũ,” he mũ. Kỹ tóg Topẽ vĩ kri fi kỹ canoa mág ẽn han mũ. Kỹ tóg ki rã kỹ kren mũ, ti prũ fi mré, ti krẽ mré ke gé. Topẽ ki rã kỹ tóg ũ tỹ Topẽ kato vãsãnsãn mũ ag mré tĩg mãn ja tũ nĩ. Hã kỹ Topẽ vỹ, ti mỹ ũn jykre kuryj ag tỹ nén venh ke ẽn ven.

Enoque vỹ, Topẽ ki rã kỹ nĩ ja nĩgtĩ gé. Hã kỹ Topẽ vỹ ti jé prẽr, ti tỹ kanhkã ra tĩg jé, ti rĩr ra, ti ter tũ ra. Ti ve mãn tũ ag tóg nĩ. Topẽ tỹ ti jé prẽr to hã tag vỹ ti to rán kỹ nĩ, Topẽ vĩ tỹ rán kỹ nĩ ki, ha mẽ: “Topẽ tỹ ti jykre ve kỹ ti fe tóg mrin ke mũ.“

Kỹ Abel vỹ Topẽ ki rã kỹ nĩ ja nĩgtĩ gé, hã kỹ tóg Topẽ mỹ pũn há han, ti tỹ ti mỹ ti mẽg pũn kỹ. Jãvo ti kãke tỹ Caim vỹ ti ki rã ja tũ nĩ. Kỹ tóg Topẽ mỹ nén ũ pũn mũ ra ti mỹ pũn kónãn. Topẽ tóg Abel to: “inh mỹ tóg tỹ ũn jykre kuryj nĩ,” he ja nĩ. Ter ti huri, Abel ti. Hã ra ẽg tóg ti tỹ nén han ja tugrĩn Topẽ ki ge há han ki kanhrãn mũ sir.

Sara fi vỹ Topẽ ki rã kỹ nĩ ja nĩgtĩ gé, hã kỹ fi tóg fi kófa pẽ ra kufyg ja nĩgtĩ, Topẽ tỹ fag tỹ tag to tar han kỹ, Sara fi, fi mén tỹ Abraão mré. Ũ tỹ fag mỹ: “kósin jé ãjag tóg ke mũ,” he mũ ẽn vĩ kri fi kỹ fag tóg, ve ja nĩgtĩ.

Ge ra tóg tovãnh ja tũ nĩgtĩ. Topẽ jamã ẽn ve sór ja ti nĩ, ũ tỹ tũ' henh ke tũ pẽ ẽn. Topẽ hã vỹ ẽmã ẽn han. To jykrén kỹ tóg han. Ti pijé ẽprã ke ag jamã ri ke nĩ'. Ẽn ve sór kỹ tóg, ti tovãnh ja tũ pẽ nĩ. Hã kỹ tóg vé, Abraão ti.

Moisés vỹ Topẽ ki rã kỹ nĩ ja nĩgtĩ gé. Hã kỹ tóg ti mog kar kỹ: “inh pijé tỹ Faraó kósin fi kósin nĩ',” he ja nĩgtĩ. Ti tỹ Topẽ povo ag mré jagtar mũ ra tóg ti mỹ tỹ nén ũ tũ ja nĩgtĩ. Hã kỹ tóg Egito tá ke ag mré riko nĩ sór ja tũ nĩgtĩ. Topẽ vĩ mranh kỹ ag tóg ón kỹ riko nỹtĩ ja nĩgtĩ. Ẽg tỹ Cristo tugrĩn jagtar nỹtĩ tag tóg ti mỹ ẽg riko nỹtĩ tag kãfór nĩ ja nĩgtĩ. Hã kỹ Egito tá ke ag riko tag tóg ti mỹ kórég ja nĩgtĩ, Moisés mỹ. Topẽ tỹ kanhkã tá ẽg mỹ nén ũ há nĩm ke ẽn hã to tóg jykrén ja nĩgtĩ. Moisés vỹ, Topẽ ki rã kỹ nĩ ja nĩgtĩ, hã kỹ tóg, ga tỹ Egito tá kãkutẽ ja nĩgtĩ, pã'i jũ kamẽg vãnh nĩn kỹ. Topẽ vég tũ ẽg tóg nĩgtĩ. Hã ra tóg, Topẽ hã ki ẽkrén kỹ nĩ ja nĩgtĩ. Hã kỹ tóg krónh ke ja tũ nĩgtĩ.

Abraão vỹ Topẽ ki rã kỹ nĩ ja nĩgtĩ gé, hã kỹ tóg Isaque nenh ja tũ nĩgtĩ. Topẽ mỹ tóg ti fẽg, Topẽ tỹ ti mỹ ti kósin to vĩn kỹ. Ti kósin pir ja vẽ, hã ra tóg ti tãnh kren, Topẽ mỹ.

Raabe fi vỹ Topẽ ki rã kỹ nĩ ja nĩgtĩ gé. Ũn mén (ka)mẽ vỹ tỹ fi nĩ ja nĩgtĩ, hã ra fi tóg Topẽ ki rã. Hã kỹ fi tóg Israel ag mỹ: “ha kãge jẽg,” he ja nĩ. Hã kỹ ag tóg, fi tén ja tũ nĩ gé. Ẽmã tỹ Jericó tá ke kar kãgtén ja ag tóg nĩgtĩ, hã ra fi hã tóg inhhã kren ja nĩgtĩ.

Israel ag vỹ, Topẽ ki ge kỹ nỹtĩ ja nĩgtĩ gé. Hã kỹ ag tóg, goj kusũg he mũ ẽn kã rẽgrẽg há han inhhã. Ẽg tỹ ga kri mũ ẽn ri ke han ag tóg. Egito tá ke ag tỹ ag nón kã rẽgrẽg sór mũ ra goj ẽn tóg, ag kri rũm ke mũ sir. Kỹ ag tóg kãgter kãn mũ sir.

Israel ag vỹ Topẽ ki ge kỹ nỹtĩ ja nĩgtĩ gé. Hã kỹ ẽmã tỹ Jericó jy ró ẽn vỹ vẽsóg ki kórég kãn ja nĩgtĩ, ag tỹ pénĩn mũ tỹ 7 (ke) han kar kỹ, ag tỹ kurã tỹ 7 (ke) ki pénĩn mũ kar kỹ.

Moisés vỹ Topẽ ki rã kỹ nĩ ja nĩgtĩ. Hã kỹ tóg Israel ag mỹ fénhta tỹ Páscoa ẽn nĩm. Ag mỹ tóg: “ovelha kyvénh tỹ ĩn jãnkã to tĩn,” he mũ, “Topẽ tỹ jẽnẽ jafã ag tỹ ãjag krẽ ve ag kãgtén tũ nĩ jé,” he ja tóg nĩgtĩ. Hã kỹ ag tóg fénhta tỹ Páscoa ẽn han tĩ, ũri ke gé.

José vỹ Topẽ ki rã kỹ nĩ ja nĩgtĩ gé. Hã kỹ tóg, ti ter ke nỹ ra Israel ag mỹ kãmén ja nĩgtĩ, ag krẽ'krẽ ag tỹ ga tỹ Egito tá kãpanh ke ẽn ti. Kỹ tóg ag mỹ to vĩ ja nĩ, ag tỹ ag kãmũ kỹ ti kuka gé kãmũ jé.

Jacó vỹ Topẽ ki rã kỹ nĩ ja nĩgtĩ gé, hã kỹ tóg, ti ter ke to hã José krẽ régre ẽn ag mỹ vĩ há han gé. Kỹ tóg ti vãtó to jẽ kỹ Topẽ krẽm mũg ke kỹ ti mỹ: “Topẽ vỹ tỹ ã nĩ,” he ja nĩ.

Isaque vỹ Topẽ ki rã kỹ nĩ ja nĩgtĩ gé. Hã kỹ tóg Jacó mỹ vĩ há han, Esaú mỹ ke gé, ti tỹ ag mỹ ag tỹ nén venh ke ẽn tó kỹ.