Popular Bible Verses from San Marcos 13

Share

Ut xicꞌ tex-ilekꞌ xbaneb chixjunileb saꞌ incꞌabaꞌ la̱in. Ut li tixcuy xnumsinquil li raylal aꞌin toj saꞌ rosoꞌjic lix yuꞌam, aꞌan ta̱colekꞌ xban li Dios.

Joꞌcan nak yoꞌon cua̱nkex. Chexyoꞌlek ut chextijok xban nak incꞌaꞌ nequenau jokꞌe ta̱cuulak xkꞌehil incꞌulunic.

Ut nak texchapekꞌ ut texkꞌaxtesi̱k chiruheb li acuabej, mexcꞌoxlac chirix li cꞌaꞌru te̱ye. Li cꞌaꞌru te̱ye saꞌ li ho̱nal aꞌan ma̱cuaꞌ cꞌoxlanbil a̱tin li te̱ye. Aban li tixye e̱re li Santil Musikꞌej, aꞌan li te̱ye.

Li choxa ut li ruchichꞌochꞌ talajeꞌosokꞌ. Abanan li cꞌaꞌru ninye incꞌaꞌ ta̱cana̱k yal chi joꞌcan. Talajcꞌulma̱nk ban chixjunil li cꞌaꞌak re ru xinye.

Abanan ma̱ ani nanaꞌoc re jokꞌe ta̱cuulak xkꞌehil li cutan aꞌan chi moco li ho̱nal jokꞌe ta̱cꞌulma̱nk. Eb li ángel saꞌ choxa incꞌaꞌ nequeꞌxnau chi moco la̱in li Cꞌajolbej ninnaꞌoc re. Caꞌaj cuiꞌ li Dios Acuabej nanaꞌoc re jokꞌe ta̱cꞌulma̱nk aꞌin.

Nak te̱rabi nak yo̱ li ple̱t ut nak te̱rabi resil nak ticla̱c re li ple̱t yalak bar, mexxucuac xban nak tento nak ta̱cꞌulma̱nk chi joꞌcan. Abanan moco ac aꞌan ta rosoꞌjiqueb li cutan.

Joꞌcan ajcuiꞌ la̱ex. Junelic yoꞌon cua̱nkex xban nak incꞌaꞌ nequenau jokꞌe ho̱nal tincꞌulu̱nk. Ma̱re tincha̱lk ecuu, malaj tuktu kꞌojyi̱n, malaj ut nak naya̱bac laj tzoꞌ xul malaj ut ekꞌela. Yoꞌon cua̱nkex re nak incꞌaꞌ tolexintau chi cua̱rc xban nak incꞌaꞌ nequenau jokꞌe tincꞌulu̱nk. Ut li cꞌaꞌak re ru ninye e̱re la̱in, aꞌan ajcuiꞌ ninye reheb chixjunileb re nak yoꞌon cua̱nkeb, chan li Jesús.

Nabal li tenamit teꞌpletik riqꞌuin jalan chic tenamit. Ut eb li acuabej teꞌxpleti ribeb. Talajcua̱nk hi̱c saꞌ nabal chi naꞌajej ut ta̱cua̱nk cueꞌej. Abanan aꞌan yal xticlajic li raylal ta̱cha̱lk.

Tento nak xbe̱n cua ta̱sutu̱nk xchꞌolobanquil resilal li colba-ib chiruheb chixjunil li tenamit nak toj ma̱jiꞌ na-osoꞌ li ruchichꞌochꞌ.

Nabal teꞌcha̱lk chi balakꞌi̱nc ut toleꞌxye, “La̱in li Cristo”, chaꞌkeb. Ut nabal teꞌbalakꞌi̱k xbaneb.

Aꞌut la̱ex cheqꞌuehak retal li raylal ta̱cha̱lk saꞌ e̱be̱n. Texkꞌaxtesi̱k chiruheb laj rakol a̱tin ut texsaqꞌuekꞌ saꞌ li cab li nequeꞌxchꞌutub cuiꞌ ribeb laj judío. Texcꞌamekꞌ chiruheb li acuabej ut chiruheb li rey saꞌ incꞌabaꞌ la̱in ut ta̱ru̱k te̱chꞌolob xya̱lal li cua̱tin chiruheb.

Nabaleb aj balakꞌ teꞌcꞌulu̱nk ut teꞌxye nak aꞌaneb li Cristo. Ut cuan teꞌxye nak aꞌaneb li profeta. Nabal li cꞌaꞌak re ru teꞌxcꞌutbesi ut sachba chꞌo̱lej telajeꞌxba̱nu re xbalakꞌinquileb li sicꞌbileb ru xban li Dios.

Ut saꞌ eb li cutan aꞌan nak ta̱cꞌulma̱nk li raylal, ta̱kꞌojyi̱nokꞌ ru li sakꞌe ut li po incꞌaꞌ chic ta̱cutanokꞌ ru. Ta̱ecꞌa̱nk ru li choxa ut li chahim telajeꞌtꞌanekꞌ.