Popular Bible Verses from Colosenses 2

Share

La̱ex xepa̱b li Cristo ut aꞌan chic yal re saꞌ e̱be̱n. Joꞌcan nak junajakex taxak riqꞌuin li Cristo, ut texcua̱nk joꞌ naraj aꞌan. Chexpa̱ba̱nk chi anchal e̱chꞌo̱l ut chetzolak e̱rib riqꞌuin li Cristo. Cauhak e̱chꞌo̱l chixpa̱banquil li cꞌaꞌru tzolbilex cuiꞌ ut junelic chexbantioxi̱nk chiru li Dios.

Me̱qꞌue e̱rib chi balakꞌi̱c xbaneb li nequeꞌxye nak cuan xnaꞌlebeb. Ma̱cꞌaꞌ na-oc cuiꞌ li cꞌaꞌru nequeꞌxye xban nak lix naꞌlebeb moco riqꞌuin li Cristo ta nachal. Aꞌan yal xnaꞌleb li ruchichꞌochꞌ ut yal xnaꞌlebeb li kaxeꞌ kato̱n.

Junxil camenakex nak quexcuan chak xban li ma̱c ut xban nak ma̱jiꞌ isinbil saꞌ le̱ chꞌo̱l lix rahinquil ru li ma̱usilal. Aban anakcuan yoꞌyo̱quex chic. Li Dios quicuaclesin cuiꞌchic re li Jesucristo chi yoꞌyo. Ut joꞌcan ajcuiꞌ la̱ex, yoꞌyo̱quex chic xban nak acꞌ chic le̱ yuꞌam qꞌuebil e̱re xban li Dios ut cuybil sachbil chixjunil le̱ ma̱c. Cuan tojba ma̱c saꞌ kabe̱n xban nak xkakꞌet li chakꞌrab tzꞌi̱banbil chak najter. Abanan li Dios quixye nak tojbil chic rix chixjunil li kama̱c xban nak li Jesucristo quicam chiru li cruz saꞌ kacꞌabaꞌ la̱o.

Me̱qꞌue e̱rib chi balakꞌi̱c xbaneb aꞌan. Nakanau nak chixjunil lix lokꞌal li Dios ut lix cuanquil cuan riqꞌuin li Cristo. Lix lokꞌal ut lix cuanquilal quixcꞌutbesi nak quicꞌulun saꞌ ruchichꞌochꞌ. Kꞌaxal nim xcuanquil li Cristo saꞌ xbe̱neb li nequeꞌtaklan ut kꞌaxal nim ajcuiꞌ xcuanquil saꞌ xbe̱neb li musikꞌej. Ut xban nak li Cristo cuan e̱riqꞌuin, nim ajcuiꞌ e̱cuanquil la̱ex ut tzꞌakal re ru le̱ yuꞌam xban nak qꞌuebil e̱re xban li Cristo.

Michꞌinan e̱chꞌo̱l cui ani nacuechꞌin e̱re riqꞌuin li cꞌaꞌru nequetzaca ut li cꞌaꞌru nequerucꞌ. Chi moco ta̱chꞌina̱nk e̱chꞌo̱l cui ani nacuechꞌin e̱re xban nak incꞌaꞌ nequeninkꞌei lix ninkꞌeheb. Cuan li nequeꞌxninkꞌei lix yoꞌlajic li po ut li hiloba̱l cutan. Chixjunil li cꞌaꞌru queꞌxba̱nu, aꞌan yal retalil li cꞌaꞌru ta̱cꞌulma̱nk. Abanan, nak quicꞌulun li Cristo, quitzꞌakloc ru li cꞌaꞌru queꞌxba̱nu eb aꞌan.