Popular Bible Verses from Mateo 10

Share

Ilaꞌla, tol chex jin chejtoj xol ánima jaxca tol chin chejtoj noꞌ meꞌ xol noꞌ ooj. Yuxan, listo cꞌal che yute je bꞌa jaxca junoj noꞌ labꞌa caw jelan. Asan xin, suc che yute je bꞌa jaxca noꞌ uch.

Jaꞌ ebꞌ asanne scawil chi syaꞌilne yul yibꞌankꞌinal tiꞌ, oj qꞌueyel skꞌinal ebꞌ yin junelne. Jal ebꞌ bꞌejan scꞌul scam jin yaꞌiloj an, jaꞌton ebꞌ tuꞌ, oj ẍaꞌ kꞌinale tol ey cꞌal yin tobꞌalkꞌinal.

Manche jex xiw tet ebꞌ chi skeꞌ jex yakꞌon camoj, yutol ¿toj oj skeꞌ yakꞌon cam je pixan ebꞌ? Jaꞌ tet Dios smoo chex xiwi, yutol chi skeꞌ jex yakꞌon camoj, catuꞌ chi yaontoj je pixan bꞌey infierno.*

Jaꞌ ebꞌ cꞌam chi yal scꞌul chi yil syaꞌilal jin yaꞌiloj an, ebꞌ cꞌam chi yal scꞌul chi ale oc yin culus jin yaꞌiloj an, man smoo oj ebꞌ yoc wetoj an.

Yal cꞌal mactxequel cꞌam chi qꞌuixwi yalon sattaj ánima tol wet an, oj wal oc ebꞌ wetoj sattaj cu Mam Dios eyecꞌ satcan. Jal ebꞌ chi alon sattaj ánima tol man wet oj an, oj wal pax sattaj cu Mam Dios eyecꞌ satcan tol man wet oj pax ebꞌ an.

Jaꞌ ebꞌ yaꞌey yu lepra, che yakꞌ can waꞌxoj scꞌul ebꞌ, cꞌal jantaj ebꞌ yaꞌey yu yal cꞌal tzet yaꞌbꞌilal. Che pitzcꞌune can a ebꞌ camnaj. Catuꞌ che yiꞌon can el pena espíritu yin ebꞌ ánima. Tucꞌal chi wakꞌ jun opiso tiꞌ ey jex, yuxan manche je kꞌan je tool tet ebꞌ bꞌey oj je yakꞌbꞌalne tuꞌ.

Jaex tiꞌ, yel miman je yeloc apnoj yintaj noꞌ tuꞌ. Jaꞌ xil je jolom masanil bꞌisbꞌil yu Dios. Yuxan, manche jex xiwi.

Manche je naꞌ tol oj oc watxꞌcꞌulal xol ebꞌ ánima yul yibꞌankꞌinal tiꞌ yutol jix jin jul an. Man oj oc watxꞌcꞌulal xol ebꞌ yutol jix jin jul an, tol oj scajle a sbꞌa ebꞌ, yutol jix jin jul an.