Popular Bible Verses from Hebreos 11

Share

As a' isuuchil u k'ujleb'al k'u'le' uva' techal la b'anchu u b'a'nile' uva' nu kutx'eb'e'. As k'uxh ye' na'l sukuvatz cheel, as ootzimal sqa'n uva' nitx'eb'on ve't sqi'. As eche' uva' kat ib'an unq'a q'esla chaj txutx b'aalae', tan ti' uva' k'ujlik chit ik'u'l chajaak ti' u Tiixhe', as b'a'n ve't iyolb'el chajaak ta'n u Tiixhe'.

Asoj ye' la ik'ujb'a' umaj uxhchil ik'u'l ti' u Tiixhe', as ye'l Aak la txuq'txun sti'. Tan ab'il uva' la isa' toksat tib' k'atz Aak, as techal la inima uva' at Tiixh as la taq' Aake' itx'aja'm u uxhchile' uve' la toksa taama ti' Aak.

As ti' uva' k'ujle'l chit kuk'u'l ti' u Tiixhe', as ni qootzi ve'te' uva' tuk' kuxh viyol Aake' as kat chee u almika'e' tuk' u vatz tx'ava'e' skajayil. As jank'al unq'a vee' uva' ni qile', as a' kat tzaakat xo'l unq'a vee' uva' ye' na'like.

As ti' uva' k'ujlik chit ik'u'l u Abraham ti' u Tiixhe', as kat inima ve't yol tul uva' kat imolo ve't u Tiixhe' u Abrahame' ti' tel ch'u'l tu u tename' uva' atikkat. As k'uxh ye' tootzaj u Abraham u tx'ava'e' uva' la oonkat, as kat b'en ve'te' ti' uva' la tetzi ve't u tx'ava'e' ta'n u Tiixhe'. As ti' uva' k'ujlik ik'u'l u Abrahame', as kat b'ex jejeb'oj tu u tx'ava'e' uva' kat taltzi' u Tiixhe' ste. As kat atin tu unq'a lakich pache', texhlal tetz uva' ech ve'te' eche' umaj ulnaj tzaanaj kat b'ex ib'ana. As echat kat ib'an u Isaac tuk' u Jacob, tan echat kuxh u yole' kat tal Aak ste.

As ti' uva' k'ujle'l ik'u'l u Noé ti' u Tiixhe', as kat ib'an ve't uma'l u arca ti' ikolat tib' vatz u k'axk'oe' tuk' unq'a tatine'. As tul kat tal ve't u Tiixhe' ste kam uva' la uli, as kat ixo'va ve't u Noé u Tiixhe'. As k'uxh ye' atixoj til u Noé kam uva' tal u Tiixhe' ste uva' la uli, as kat inima ve't u Noé. As kat ok ve't jikla aamail ta'n u Tiixhe'. As tuk' u k'ujleb'al ik'u'l u Noé, as kat tal ve't isuuchil te unq'a tename' uva' techal la ul u k'axk'oe' ti' unq'a tename' uva' ye' ni niman u Tiixhe'.

As echat kat ib'an u Enoc, tan ti' uva' k'ujle'l ik'u'l ti' u Tiixhe', as ye' kat pal tu u kamchile'. As ye'xheb'il kat ilon ve'te', tan ma'tik teq'ol ve't ta'n u Tiixhe'. As tul ye'xnik eq'ol u Enoc, as b'a'nik ve't iyolb'ele' ta'n Aak.

As eche' uva' kat ib'an u Abel tan k'ujlik chit ik'u'l ti' u Tiixhe', as kat toksa u oye' uva' nim talche' ti' u tetz u Caíne' vatz u Tiixhe'. As b'a'n ve't iyolb'el u Abele' ta'n Aak, tan kat ik'ul Aak u oye' uva' kat toksa u Abele' vatz Aak. As k'uxh kamnal ve't u Abel, as nitel ichus o' cheel ti' kuk'ujb'a't kuk'u'l ti' u Tiixhe'.

As ti' uva' k'ujlik chit ik'u'l u Sara ti' u Tiixhe', as k'uxh ma'tik iq'esb'u ve'te' as k'uxh ye' nik talane', poro kat yak'in ve't vichi'ole' ta'n u Tiixhe'. As kat itz'eb' ve't uma'l u tal u Sara, tan nik inima u Sara tuk' u Abraham uva' la chit ib'an u Tiixhe' kam uva' altzi'mal kan ste ta'n Aak.

As a' nik itx'eb' u Abrahame' ik'ujb'a'l u b'a'nla tename' uva' ye' la e'pi, eche' umaj kab'al uva' chab'amal ik'ujeb'e' vi' u tz'aje', tan a' u Tiixhe' la k'ujb'a'n, tan Aake' cheesan tetz.

As tul ok ve't u Moisés najil, as k'ujlik chit ik'u'l ti' u Tiixhe'. As ye' nik isa' uva' la tal unq'a tename' sti' uva' itxutx u Moisés vime'al u ijlenaale'. Pet a' nik isa' u Moisés uva' eela tixvale' tuk' unq'a imoole' uva' tiaal Israel uva' itenam Tiixh. As ye' nik isa' u Moisés ipaavine' ti' tatin k'atz u ijlenaale' tu u Egipto ti' u chiib'ichile' uva' palchil kuxhtu', tan a'ik u tx'aja'me' uve' la taq' u Tiixhe' ste, as a'e' uva' nik titz'a u Moisés. Esti'e' uva' kat tixva ve't kan unq'a nimla tx'iib'al q'iie' uva' laik tetzi tu u Egiptoe'. As aal b'a'nik ste uva' la ipaleb'e u k'axk'oe' tuk' unq'a imoole', tan atik sk'u'l uva' la ul u Jesús uva' alel kan u tuleb'ale' ta'n u Tiixhe'. As ti' uva' k'ujlik chit ik'u'l u Moisés ti' u Tiixhe', as kat taq' ve't kan u Moisés u Egipto. As ye' kat xo'v ve'te' tul kat ul ivi' u ijlenaale' sti'. As ye' kat ka'kab'in taama, tan eela kuxh stuk' uva' nik til u Moisés u Tiixhe', k'uxh ye' na'lik Aak svatz.

As ti' uva' k'ujlik ik'u'l u Abraham ti' u Tiixhe', as kat inima tul uva' kat tal u Tiixhe' ste uva' la toksa ok vik'aole' vatz Aak, k'uxh ta'n chite' unch'i'til. As aalik chit iyatz'at ve't u Abraham vik'aole', k'uxh ma'tik ichiib' u Abraham ti' unch'i'til vik'aole' uva' Isaac ib'ii.

As u yana'sla ixoj uva' Rahab, as ik'ujb'a' ve't ixoj ik'u'l ti' u Tiixhe', as ye' kat kam ve'te' tul uva' kat kam unq'a paasan tziie' uve' atik tu u Jericó, tan ti' uva' kat ib'an ixoj b'a'nil te unq'a uxhchile' uva' kat b'ex ilon kam b'an ta'n u tename' uva' Jericó.

As ti' uva' k'ujlik chit ik'u'l unq'a itenam u Tiixhe', as kat icheesa Aak b'ey tu u mar tul kat pal ve't unq'a tename' tu u mar uva' Kaj Mar ib'ii. Pet ech koj unq'a aa Egipto, tan tul kat tal ipal tu u mar, as kat ijup ve't tib' u mar sti'. As kat kam ve'te'.

As ti' uva' k'ujlik chit ik'u'l unq'a itenam u Tiixhe', as vujva'l q'ii isuturit tib' ti' u tename' uva' Jericó. As kat e'p ve't unq'a tz'aje' uva' atik ve't ok ti' u tename'.

As ti' uva' k'ujlik chit ik'u'l u Moisés ti' u Tiixhe', as kat inima ve't u Moisése' u yole' ti' uva' la kolax vitenam u Tiixhe' vatz u kamchile' tul kat tzikul ok vikajal unq'a avane' tzi'aj vikab'ale', aq'al uva' ye' la kam unq'a b'axa ik'aol unq'a itenam u Tiixhe' ta'n u yatz'ol aamae'.

As ti' uva' k'ujlik chit ik'u'l u Xhu'le' ti' u Tiixhe', as tul unb'iitik kuxh ikam ve'te', as tal ve't kan te unq'a titz'in tatzike' uva' la chit ilej uma'l u q'ii uva' la el ve't ch'u'l unq'a tiaale' tu u Egipto. As tal ve't kan u Xhu'le' unpajte uva' la eq'ol el vib'ajile' tu u Egipto.

As ti' uva' k'ujlik chit ik'u'l u Jacob ti' u Tiixhe', as tul unb'iitik kuxh ikam ve'te', as taq' ve't kan u Jacob vib'a'nile' ti' junun vik'aol u Xhu'le'. As tul b'a'nxi, as ixi'a ve't tib' ti' vikarootee'. As toksa ve't iq'ii u Tiixhe'.

As ti' uva' k'ujlik chit ik'u'l u Isaac ti' u Tiixhe', as taq' ve't kan u Isaac u b'a'nile' ti' unq'a ik'aole', u Jacob tuk' u Esaú. As kat tal ve't u Isaac isuuchil te chajnaj ti' uva' kam la til chajnaj uva' xamtel.