Popular Bible Verses from Ephesians 4

Share

Pet b'a'noj etxumb'al sevatzaj. Etxumtaj tib' evatz; as esotzsataj tib' epaav sevatzaj, eche' uve' kat ib'an u Tiixhe' sete, tan kat isotzsa Aak vepaave' ta'n u Cristo.

As ye' la eje'sa etib' sevatzaj. Pet sula aama chit ex la ib'ane'. As la ekuy etib' sevatzaj, tan ti' uva' nexo'ni etib' sevatzaj.

Eli'k ch'u'l umaj va'lexhla yol tetzi'. Pet b'a'n eyolone' la eb'ane', aq'al uva' la eyak'insa taama unq'a uxhchile' uve' la ab'in veyole'.

As eteesataj unq'a va'lexhla txumb'ale' tu vetaanxelale' eche' u chi'chol aamaile', u tx'i'tzi'le', u ulchil vi'e', u yaaib'e', u yoq'o'me', as tuk' unjoltu unq'a va'lexhe'. As eya'sataj.

Asoj la ul evi', as la til je' etib', aq'al uva' ye' la paavin ex. As ye' la pal u q'iie' seti'. Pet oora kuxh la eya'sa u ulchil vi'e'. As ye' la etaq' tokeb'al u tx'i'lanaje' ti' uva' la paavin ex ta'n naj.

As a' u chusb'ale' uva' kat chuspu ve't ex sti' ti' uva' la etaq' ve't kan unq'a txumb'ale' uva' nikat eb'an b'axa uva' chiannalik sete, tan eesamalik vetxumb'ale' tu b'ey ta'n u tacha'v vechi'ole'. As la etaq' tokeb'al u Tiixhe' ti' ijalput Aak vetxumb'ale' tan ti' uva' kat taq' Aak uma'l u ak' txumb'al sete uva' Aak cheesan tetz. As ech ve't u ak' txumb'ale' eche' vitxumb'al Aake', tan jik chit u ak' txumb'ale' uva' kat taq' Aak sete. As ye'l umaj va'lexh la chee sta'n.

As etaq'taj yak'il ti' uva' unvatzuloj chit ex la ib'ane' ti' chit ib'ene', tan unvatzul ve't o' setuk' ta'n u Tiixhla Espíritu. As b'a'noj chit etatine' sevatzaj la ib'ane'.

As an chit u Jesucristoe' kat oksan o' apóstolil xo'l vitenam Aake'. As kat toksa Aak ka't uxhchil q'ajsan tetz viyole', tuk' ka't unq'a paxsan tetz u b'a'nla yole' ti' Aak, as tuk' ka't unq'a uxhchile' uva' ni alon isuuchil viyol Aake'. As tuk' unq'a uxhchile' uva' ni ilon isuuchil vitenam u Tiixhe', tan ech nib'ane' eche' unq'a xeen txooe'. As ech kat ib'an Aak, tan a' isa' Aak uva' o' la aq'on itxumb'al vitenam Aake', ti' uva' la aq'onvu chajaak ti' ib'anata' jank'al uva' nisa' Aak uva' la ib'ane'. As la yak'in ve't u taanxelale' skajayil. As b'a'n ve't tatine' svatzaj la ib'ane' k'atz u Jesucristo. As vatzul ve't u k'ujleb'al kuk'u'le' ti' viK'aol u Tiixhe'. As acha'v ve't qatin sukuvatzaj la ib'ane', o' uva' ootzimal ve't Aak sqa'n. As jik ve't u kutxumb'ale' la ib'ane'. As la xekeb' ve't u kutxumb'ale' ti' vitxumb'al Aake' uva' jik chittu'

aq'al uva' jit'e'ch u kutxumb'ale' la ib'ane' eche' itxumb'al umaj talaj intxa' uva' nu kuxh ijalpu vitxumb'ale'. Pet ye' la qaq' qib' maxtib'eloj te unq'a chulin yole' uva' va'lexhla chusb'al nichuse'. As jit'e'ch la ib'an u kutxumb'ale' eche' nib'an umaj barco vi' u mare', tan kat kuxh nib'enkat u barco ta'n u kajiq'e'. Pet kuk'uchtaj u jikla yole' ti' u Jesucristo tuk' u kutxumb'ale'. As kuxo'nitaj qib' sukuvatzaj. As la chee ve't imaas kutxumb'al aq'al uva' ech u kutxumb'ale' eche' u Jesucristo, tan ech tatin Aake' sqi' eche' u kuvi'e', tan a' u kuvi'e' eq'on tetz u kuchi'ole' skajayil.