Popular Bible Verses from Salāmo 51

Share

Le Atua e, ‘ia e faia se loto mamā mo a‘u; ma ‘ia e fa‘afouina se loto mau i totonu ‘iā te a‘u.

‘Ia e fa‘afoisia mai ‘iā te a‘u le ‘oli‘oli o le olataga mai ‘iā te oe; ‘ia e tāofimauina fo‘i o a‘u ma le loto fiafia.

‘Aua ‘e te lafoa‘iina a‘u i ou luma; ‘aua fo‘i ‘e te ‘ave‘eseina lou Agaga Pa‘ia ‘iā te a‘u.

O taulaga i le Atua, o le loto momomo lea; le Atua e, ‘e te lē ‘inosia le loto momomo ma le nutimomoia.

Le Atua e, ‘ia e alofa mai ‘iā te a‘u, e tusa ma lou lava alofa; e tusa ma le tele o lou alofa mutimutivale ‘ia e sōloi‘esea ‘ou solitulafono. ‘Ia e matuā fufulu mai ‘iā te a‘u i la‘u amio leaga, ma ‘ia e fa‘amamā mai ‘iā te a‘u i la‘u agasala.

‘Ia e fa‘amamā ‘iā te a‘u, i le isopo, ‘ona mamā ai lea o a‘u; ‘ia e fufulu mai ‘iā te a‘u, ‘ona sinasina ai lea o a‘u e sili i lo le kiona.

‘Ua ‘ou agasala atu ‘iā te oe na o oe lava; ‘ua ‘ou faia fo‘i lenei mea leaga i ou luma; e tonu ai oe i lau fetalaiga, e sa‘o fo‘i oe pe a e fa‘amasino.