Popular Bible Verses from Isaia 55

Share

Auā o o‘u manatu e lē o ‘outou manatu, o o‘u ala e lē o ‘outou ala, ‘ua fetalai mai ai le ALI‘I.

Auā e pei ‘ona sili ‘ona maualuga o le lagi i le lalolagi, ‘ua fa‘apea ‘ona sili ‘ona maualuga o o‘u ala i o ‘outou ala, ma o‘u manatu e sili i o ‘outou manatu.

‘Ia ‘outou sā‘ili i le ALI‘I manū o mafai ‘ona maua o ia; ‘ia ‘outou vala‘au ‘iā te ia manū o latalata mai o ia.

‘Ia lafoa‘i e lē ‘ua amio leaga lona ala, ma le tagata agasala ‘ia lafoa‘i e ia ona manatu. A ‘ia fo‘i mai i le ALI‘I, ‘ona alofa mai lea o ia ‘iā te ia. ‘Ia fo‘i mai i lo tatou Atua, auā na te matuā fa‘amāgaloina.

E! ‘outou uma o ē fia inu, ō mai ia i le vai, ‘atoa ma ‘outou ‘ua leai ni tupe, ō mai ia, ‘inā fa‘atau ma ‘a‘ai. ‘Ia ‘outou ō mai lava, ma fa‘atau le uaina ma le suāsusu, ‘ae leai se tupe, e leai fo‘i se tau e fa‘atau a‘i.

Auā e pei ‘ona totō ifo o le timu ma le kiona mai le lagi, ‘ae lē toe fo‘i atu i ai. ‘Ae peita‘i e fa‘asūsūina ai le lau‘ele‘ele, ma fua mai ai ma totogo mai ai, e tupu mai ai saito i lē lūlū saito ma mea e ‘ai i le ‘ua ‘ai. E fa‘apea fo‘i la‘u ‘upu e alu atu a‘i lo‘u gutu, e lē fo‘i mai fua ‘iā te a‘u. ‘Ae peita‘i e faia le mea ‘ou te loto i ai, e manuia fo‘i i le mea ‘ou te ‘auina atu ai.

Auā tou te ō atu ma le fiafia, e ta‘ita‘iina fo‘i ‘outou ma le manuia. O atu mauga ma mauga e leo tetele, ma le ‘alaga fiafia i o ‘outou luma, e pati lima fo‘i la‘au uma o le vao.

Ua‘i mai ia o ‘outou taliga, ma ‘outou ō mai ‘iā te a‘u; fa‘alogologo mai ia, e ola ai o ‘outou agaga. ‘Ou te osia fo‘i le feagaiga e fa‘avavau ma ‘outou, o mea alofa ia na folafolaina ‘iā Tavita e fa‘amaoni lava.