Popular Bible Verses from Isaia 12

Share

Fa‘auta, o le Atua, o lo‘u fa‘aolataga ia; ‘ou te fa‘atuatua, ‘ou te lē fefe. Auā o le ALI‘I le ATUA, o lo‘u malosi ia ma la‘u pese; ‘ua ‘avea fo‘i o ia mo‘u fa‘aolataga.

Tou te utu vai ma le ‘oli‘oli i vaipuna o le fa‘aolataga.

Pepese atu ia i le ALI‘I, auā ‘ua faia e ia mea silisili ‘ese; ‘inā fa‘ailoa atu ia o lea mea i le lalolagi uma.

O lea aso fo‘i tou te fa‘apea atu ai: ‘Ia ‘outou vivi‘i atu i le ALI‘I, ‘inā vala‘au atu ia i lona suafa. ‘Ia ‘outou fa‘ailoa atu i nu‘u o ana galuega; ‘ia ‘outou ta‘uta‘u atu ‘ua vi‘ia lona suafa.

O lea aso fo‘i ‘e te fa‘apea mai ai: Le ALI‘I e, ‘ou te vivi‘i atu ‘iā te oe, auā sa e to‘atama‘i ‘iā te a‘u, a ‘ua mavae lou to‘asā, ma ‘ua e fa‘amatalaloto mai ‘iā te a‘u.

‘Alaga ia, ‘ia leo tele ma le fiafia, o oe o lē nofo i Siona; auā e silisili ‘ese le Pa‘ia o Isaraelu, o lē o afio i totonu ‘iā te oe.