Popular Bible Verses from Jesaja 42

Share

Ekj sie de HAR, un ekj deed daut rajchte aus ekj mie die beroopt. Ekj hab diene Haunt jehoolen un die jeschizt; derch die woa ekj eenen Bunt met de Menschen moaken, un du woascht een Licht fa de Velkja sennen. Derch die woaren de blinje to seenen kjrieen, un dee waut em Jefenkjnis sent, friejeloten woaren, soogoa dee von em diestren Kjala.

Ekj sie de HAR, soo heet ekj, un ekj lot kjeenem de Iea haben, waut mie traft, un lot kjeen Aufgott de Aunerkjanunk kjrieen, dee mie traft.

Hia es mien Kjnajcht, däm ekj unjastett; däm hab ekj jewält, un dee jefelt mie von Hoaten. Ekj hab mienen Jeist en am nenjejäft, un hee woat mank de Velkja enfieren, waut rajcht es.

Dän enjekjnekjten Haulm woat hee nich aufbräakjen, un dän schwälenden Docht woat hee nich utmoaken. Hee woat truhoatich daut enfieren, waut rajcht es. Hee selfst woat nich vegonen un nich vebräakjen, bat hee daut, waut rajcht es, oppe Ieed enjefieet haft, un aule Velkja woaren no siene Lia luaren.

Dee waut blint sent woa ekj leiden opp eenen Stich, dee an nich bekaunt es; ekj woa an eenen Wajch wiesen von dän see nich wisten. Waut an diesta wia, woat an kloa woaren; waut oneegol wia, woa ekj jlei moaken. Dit hab ekj mie väajenomen, un ekj woa daut nich oppjäwen.

Daut, waut ea jeprofezeit wort, es aula soo romjekomen. Nu saj ekj junt waut nieet; ekj saj junt daut ea daut hia es.