Popular Bible Verses from Liera 2

Share

Gott säajent goode Menschen met Weisheit, Vestentnis un Freid. Oba däm Sinda moakt hee schaufen, daut hee waut saumelt un waut toopkjricht, un daut woat doch däm, to wäm Gott sikj freit, jejäft. Un daut es uk nich to vestonen; daut es aus wan eena dän Wint jriepen well.

De Mensch kaun nuscht bätret doonen, aus äten un drinkjen un sikj to siene Oabeit freien; mie wort daut groot daut Gott ons dee doatoo jeft. Wäa kaun onen am äten, ooda sikj to waut freien?

Un aus ekj äwa aul daut, waut ekj jedonen haud, un wuatoo ekj mie bemieecht haud, nojedocht, funk ekj daut et nich to vestonen wia. Daut es, aus wan eena dän Wint jriepen well; doa wia nuscht opp dise Ieed, waut eenem oppe Lenjd waut holp.

Aules, waut mie jankad to seenen un notoseenen, leet ekj mie, un ekj hilt mie von nuscht trigj, waut mie kunn scheen gonen. Ekj freid mie to aules, wuatoo ekj mie hanjeef, un waut ekj doarut kjrieech, wia daut scheengonen.

Mie wort daut gaunz kloa: De Weisheit es sooväl mea wieet aus schoslich sennen, krakjt soo aus Licht mea wieet es aus daut diestre.

De weisa Mensch haft Uagen, daut hee seenen kaun, oba de Schosel jeit em diestren rom. Doch, ekj sach daut en, daut schlieslich storwen see aulebeid.

wiels de Mensch, dee weis, vestentlich, un jeschekjt met sien Jewenst jeoabeit haft, mott aules fa däm loten, dee doa nuscht to jedonen haft. Dit es uk nich to bejriepen, un daut es schod.