Popular Bible Verses from Jo Ibru 11

Share

Niye aye ma moko gin ma dano geno, en gin ma niaŋowa maber ni, jami ma pe gineno komgi gitye. Pire omiyo Lubaŋa opwoyo jo macon.

Laboŋo niye pe twerre me yomo cwinye, pien ŋat ma mito nyiko cok bot Lubaŋa myero oye ni en tye ada, dok bene ni en miyo bakacic bot jo ma yenye.

Pi niye waniaŋ ni, Lubaŋa yam oketo lobo kulu ki lokke, mumiyo gin ma nen gitiyo nia ki i kom gin ma pe nen.

Pi niye Abraim owinyo dog Lubaŋa i kare ma olwoŋe me cito i lobo mo mukene ma onoŋo yam en mito miye ni obed mere. En oa ki i lobo tugi kun pe ŋeyo ka ma ecito iye. Pi niye omiyo en obedo macalo welo i lobo ma yam Lubaŋa ociko pire, macalo ebedo i lobo pa lurok, kun bedo i kema gin ki Icaka ka Yakobo, ma gin bene gimiyogi kit cikke acel-lu.

Pi niye Nua bene, ka Lubaŋa ociko en pi gin ma peya onen, owinyo doge, ka doŋ opayo yeya pi laro jo me ode. Niyene-nu omiyo kop oloyo lobo, omiyo en onoŋo kit ma atir ma bino pi niye.

Pi niye Enoka yam gitiŋo gitero woko malo wek pe obil to. Pe gimedo ki noŋone, pien Lubaŋa onoŋo doŋ otere woko. I kare ma pud peya gitere, gimiyo lok me caden i kome, ni oyomo cwiny Lubaŋa.

Pi niye Abel otyero gitum maber ma kato pa Kain woko bot Lubaŋa; meno omiyo gipwoye ni kite atir, kun Lubaŋa aye obedo cadenne pi gamo motte. En oto, ento pi niyene omiyo pud loko.

Pi niye omiyo Cara onoŋo teko me yac, kadi bed mwaka me nywalle onoŋo doŋ okato woko. Man otimme pien en otamo ni, ŋat ma ociko-ni genne.

Pien en onoŋo tye ka kuro gaŋ ca ma tye ki gutine ducu matek, ma Lubaŋa aye obedo ŋat mugoyo calle, ki lagedone kikome.

Pi niye Moses, ka doŋ odoŋo, pe oye ni myero gilwoŋe ni en e wod pa nya pa Parao, kun oyero me neno can kacel ki jo pa Lubaŋa ma ka bedo ki yomcwiny me bal ma ri pi kare manok mo keken-ni. En otamo ni yet ma giciro pi Kricito obedo lonyo madit makato lonyo ducu ma tye i Ejipt, pien onoŋo ociko waŋe kun neno mot me kare me anyim. Pi niye Moses oa woko ki i Ejipt kun pe lworo kiniga pa kabaka; ociro matek, macalo en neno Lubaŋa ma pe nen.

Pi niye Abraim, ka yam giteme, otyero Icaka macalo gitum bot Lubaŋa; ŋat ma Lubaŋa ocikke bote oyubbe me tyero wode acel keken macalo gitum bot Lubaŋa

Pi niye Rakab ma obedo malaya pe oto kacel ki jo ma pe gubedo luwiny, pien onoŋo en yam ojolo lurot-piny ki kuc.

Pi niye jo Icrael guŋolo Nam Makwar macalo giwoto ki i wi ŋom mutwo; ento jo Ejipt gumwony woko liweŋ i nam i kare ma gin bene gutemo me kato kit meno.

Pi niye omiyo cel me Jeriko orette opoto woko piny ma doŋ jo Icrael gurumo pi nino abiro.

Pi niye bene omiyo en okwero nino madit me Kato, dok okiro remo, wek omi lanek litino kayo pe ogudgi.

Pi niye Yucepu, i agikki me kwone, oloko pi a pa jo Icrael ki i Ejipt, ka doŋ ociko pi kit macalo myero gibiyike kwede.

Pi niye Yakobo bene, ka doŋ to, olamo gum i kom litino pa Yucepu, kun lamo i kom latin acel acel, ma okulo wiye i wi odoo me komone, me woro Lubaŋa.

Pi niye Icaka olamo gum i kom Yakobo ki Ecau pi kare me anyim.