Popular Bible Verses from Jo Kolocai 2

Share

Macalo yam doŋ wuye Rwot Yecu Kricito, myero bene wubed i en. Lwitwu odony ocuŋ matek i kome, dok wubed macalo ot ma gigero i kome, ma wucuŋ matek i niyewu kit macalo yam gipwonyowu kwede, kun pwocwu bene medde ameda.

Wugwokke wek ŋat mo pe oŋakwu woko ki tam me ryeko nyo me bwola mo ma tere pe, kun wulubo kit pa kwaro ki pwony pa jogi macon me lobo, ma pe wulubo Kricito.

Wun ma yam onoŋo doŋ wuto woko pi balwu, ki ni pien pe giliro riŋo komwu, wun aye doŋ Lubaŋa omiyo wukwo kacel kwede, kun bene doŋ oweko balwa woko ducu. En bene yam oŋolo banya ducu ma gicoyo i wiwa pi cik ma ceŋ omiyo kop oloyowa, ocwalo cen ci oguro woko i kom yatariya.

Pien i kom Kricito ma odoko dano-ni en aye Lubaŋa opoŋ iye kit ma etye kwede i yo ducu. Wun bene doŋ wupoŋ ki kwo i kit ducu i Kricito. En obedo lawi luloc ki wegi twer ducu.

Pi meno, ŋat mo pe myero oŋol kop i komwu pi lok kom cam nyo ginamata, kadi pi nino madito, nyo por dwe, nyo pi cabit. Magi ducu gubedo tipo keken ma nyuto gin ma bibino, ento kom gin meno tye bot Kricito.