Popular Bible Verses from 1 Jn 3

Share

Ex inkok'al, moorahok yal chi aatin malaj chi xtz'uumal qe, choorahoq b'an rik'in qab'aanuhom ut chi tz'aqal yaal.

A'in xqataw wi' ru k'aru li rahok, rik'in naq li Jesus kixk'e li xyu'am sa' qak'ab'a'; jo'kan naq laa'o ajwi' tento tqak'e li qayu'am sa' xk'ab'a'eb' li qas qiitz'in.

K'ehomaq reetal, k'ajo' xnimal li qaraab'al xk'ehom qe li Yuwa'b'ej: naq ralal xk'ajol li Yos naqak'ab'a'in, ut relik chi yaal naq laa'o ajwi'. Li ruuchich'och' ink'a' naxnaw qu xb'aan naq ink'a' xnawom ru A'an.

Ani nab'aanunk re li maak a'an re laj tza, xb'aan naq laj tza namaakob'k chalen chaq sa' xtiklajik. A'in aj e naq kolxk'ut rib' li Ralal li Yos, re xsachb'al li xk'anjel laj tza.

Yalaq ani yo'lajenaq rik'in li Yos ink'a' naxb'aanu li maak xb'aan naq li xyu'am li Yos wank rik'in; ut ink'a' naru namaakob'k, xb'aan naq yo'lajenaq rik'in li Yos.

Wi junaq b'ihom naril li ras riitz'in naq wank sa' rajb'al ru ut ink'a' tixtenq'a, chanru naq li xrahom li Yos wanq rik'in?

Ani napaab'ank reheb' li xchaq'rab', nakanaak rik'in li Yos ut li Yos nakanaak rik'in. A'in naqanaw wi' naq li Yos wank qik'in chi junelik: xb'aan li Musiq'ej li xk'ehom chaq qe.

Rik'in a'in nawnookeb' ru li ralal xk'ajol li Yos ut eb' li ralal xk'ajol laj tza: yalaq ani ink'a' nab'aanunk re li tiikilal, moko re ta li Yos; jo'kan ajwi' li ink'a' naxra li ras riitz'in.

Xb'aan naq a'an a'in li esilal xerab'i laa'ex chalen chaq sa' xtiklajik: naq chiqara qib' chiqib'il qib'.

Ex was wiitz'in, misachk eech'ool wi xik' nekexril li ruuchich'och'.