Popular Bible Verses from 2 Corintios 12

Share

Sinioro shaꞌhuitërinco: “Ca nohuanto, ipora huantaꞌ parisitapiranhuëꞌ, nosoroatënquën, naꞌcon catahuaranquën. Carinquën achinicancanaranquën noya ahuantamaso marëꞌ. Co quëmaora nanitohuatanhuëꞌ, naꞌcon naꞌcon catahuaranquën. Maꞌsona tërantaꞌ onpohuatan, co onporontaꞌ pataranquënhuëꞌ,” itërinco. Napoaton co huachi sëtërahuëꞌ. “Co caora nanitohuatërahuëꞌ, Quisocristo naꞌcon naꞌcon catahuarinco,” taꞌto, noya cancantërahuë.

Napoaton co chiníquën cancantopirahuëꞌ, co paꞌyanahuëꞌ. Pinopachinacora, co noꞌhuitërahuëꞌ. Maꞌsha pahuantopirincohuëꞌ, co ina yonquirahuëꞌ. Quisocristo imarahuëso marëꞌ aparisitohuachinacora, ahuantërahuë. Sacaiꞌ nipirinhuëꞌ, nóya cancantërahuë. “Co caora nanitohuatërahuëꞌ, naꞌcon naꞌcon catahuarinco,” taꞌto, chini chiníquën cancantërahuë.

“Naꞌcon naꞌcon nitotërahuë,” itëranquëmaꞌ naporini, noꞌtëquën nonchitënquëmahuëꞌ, co nonpinchitënquëmahuëꞌ. Nipirinhuëꞌ, co ina pochin nontëranquëmahuëꞌ. Nani nohuitëramaco. Aꞌchintohuatënquëmara, natanamaco. Naporahuësopita niꞌnamaꞌ. Inaíchin yonquiatomaꞌ, noya niꞌco topirahuëꞌ. Napoaton co aquëtëꞌ shaꞌhuitaranquëmahuëꞌ. Yosë naꞌcon naꞌcon anitotërinco. Ina quëran ama aꞌnapita nocanaꞌhuaso marëhuëꞌ ina nohuanton, maꞌsha onporahuë. Nahuan acoposha ohuanincoso pochin natanahuë. Co oshahuanaporahuëꞌ, Satanasë naꞌcon aparisitërinco.