Lik chirajawaxik kaweta'maj wa': Chupa taq ri k'isb'al q'ij lik k'ayew chi ri jeqelem che ruwachulew ruma ri kib'inik kisilab'ik taq ri winaq. Ma e k'o ri xew kakitaqej ri kakaj rike, e k'o ri lik e rayinel re puaq, e k'o ri lik kakitak'ab'a' kiq'ij, e k'o ri kakik'aq b'i kiq'ij ri katz-kichaq', e k'o ri tzel kech'a't chikij jujun chik, e k'o ri na kakikoj ta kitzij kichu-kiqaw, e k'o ri na jinta kakitioxij, e k'o ri na kakixi'ij ta kib' chwach ri Dios. E k'o ri na jinta k'ana rutzil k'u'xaj kuk', e k'o ri na jinta k'ana k'axna'b'al kik'u'x, e k'o ri e aj molot, e k'o ri na kakich'ij ta uq'atexik ri kirayib'al, e k'o ri lik e titz'itaq, e k'o ri tzel kakil ri utz. E k'o ri e k'ayinel re katz-kichaq', e k'o ri na kakich'ob' tana raqan ri kaki'ano, e k'o ri lik kaki'an nim che kib', e k'o ri xew kakitzukuj ruqusil ruwachulew y na e ta kakitzukuj ri Dios. E k'o ri kaki'an pacha' lik utz ki'anom chwach ri Dios pero na kiya'om ta luwar che ri Dios kujalk'atij ri kib'inik kisilab'ik ruk' ruchuq'ab' Rire. Ma'an awe kuk' ri kaki'an taq wa'.