Popular Bible Verses from Njé gə́ Kolosə 2

Share

Bèe ndá to gə́ seḭ taaje Jeju Kristi Mbaidɔmbaije gə meḛ sí ndá maji kar sí ɔmje səa na̰’d sad ya. Ulaje ŋgira sí naŋg rəa’g kiŋ-kiŋ, ɓa meekun lə sí a ɓəbərə ne dɔ’g kaw-kaw ɓəi gə goo ta gə́ deḛ ndoo sí ləm, arje ta ra Ala oiyo oji ne na̰ ta sí’g dḛ̀gé-dḛ̀gé ləm tɔ.

Undaje kəmkàr dɔ rɔ sí’g mba kar dee busu sí gə sutaje el əsé gə kəsta gə́ gə mḭdé-mḭdé ba el. Taje neelé deḛ dum gin dee dɔ néjiɓee’g lə dəwje ləm, gə dɔ négər gə́ dɔtar gə́ ka̰ naŋg nee gə́ tar néje gə́ tar ɓəi ləm tɔ ɓó tum gin dee dɔ Kristi’g el.

Seḭ lé seḭ wəije yoo-kalta lə sí lé ləm, gə yoo-néra sí gə́ wɔji dɔ goré gə́ deḛ goré ne dakasrɔ sí el ləm tɔ nɛ Ala nja ar sí tel sije kəmba gə Kristi na̰’d loo gə́ yeḛ ar mée oso lemsé dɔ kaltaje’g lə sí. Yeḛ bɔr godndu gə́ ila ta dɔ sí’g gə́ oma̰ sə sí lé pəd-pəd ləm, yeḛ ɓəree kaar kag-dəs’g tujee ne pugudu ya ləm tɔ.

Mbata Kristi lé un kubururɔ Ala ya lad-lad. Mbɔl dɔ Kristi, yeḛ gə́ to mbai dɔ dəw-dɔ-looje lai ləm, gə mbai dɔ njésiŋgamoŋje lai ləm tɔ lé seḭ nja unje ne néje lai gə́ wɔji dɔ sí lad ya.

Bèe ndá arje dəw kára kara ila ta dɔ sí’g wɔji ne dɔ nésɔ sí əsé dɔ nékai sí el ləm, əsé wɔji dɔ naḭ gə́ raje el ləm, əsé wɔji dɔ naḭ gə́ teḛ sigi’g el ləma, əsé wɔji dɔ ndɔ-kwa-rɔje’g lé el ləm tɔ. Néje lai neelé to gə́ ndil néje gə́ gəd gə́ d’a gə ree ɓəi nɛ Kristi ɓa to gə́ darɔ né gə́ gəd ya.