Popular Bible Verses from 1 Pedro 4

Share

Yey ri más chirajawaxic wi e ruc' ronoje c'u'x alak c'ax cana' ib alak chiwach alak, ma we lic c'o rutzil c'u'xaj uc' alak, ri' cacuy alak tak ruq'uiyal mac que ri nic'aj chic.

Ec'u chirij ri uya'om ri Dios pak'ab alak, cheto'o alak ri jujun chic, cha' jela' cu'an alak sakil aj chaquib re ri Dios y cachacun alak chi utz ruc' ruq'uiyal uwach to'bal uya'om ri Dios che alak.

We c'o junok cac'utun chiquiwach ri hermanos, e chuc'utu puwi ri cubi'ij Ruch'a'tem ri Dios y na xa ta pa re cach'a'tic. We c'o junok caraj quebuto' ri ticawex, chu'ana wa' ruc' ri chuk'ab ya'tal che ruma ri Dios. Ronoje c'u ri ca'an alak, 'ana alak re yacbal uk'ij ri Dios ruma ri Kanimajawal Jesucristo, ri lic takal che c'o yacbal uk'ij y catakan c'u paquiwi conoje wak'ij ora y chikawach apanok na jinta utakexic. Amén.

No'j we c'o junok cutij c'ax ruma ucojom rubi' ri Cristo, maq'uix c'u ri' che; ri chu'ana' e chuyaca uk'ij ri Dios ruma wa'.

Lic xa nakaj chi c'o wi lo ruk'ijol echiri' caq'uis ri na utz ta uwach y cajalc'atisax c'u ronoje ri c'olic. Ruma c'u ri', lic c'ola na'oj alak puwi' sa' tak ri ca'an alak y xaki e ya'a ib alak pa oración chwach ri Dios.

Hermanos, macam anima' alak che tak runimal c'axc'obic cape pawi' alak re cuc'am pa alak, ma konoje cojic'ow chupa wa'. Ri 'ana alak e qui'cota alak, ma alak bare jun che tak ri c'axc'obic xic'ow wi ri Cristo, cha' echiri' cuk'alajisaj runimal uchomalil, ralak lic caqui'cot alak che.

Chec'ulu alak chi utz ri quebopon chi ocho alak y mawunwut ne alak che u'anic wa'.

E uwari'che, e tak ri e c'o pa c'ax ruma caqui'an janipa ri caraj ri Dios, e qui'ana ri' ri lic usuc' y quiya'a c'u ri quic'aslemal puk'ab ri Dios, ri x'anaw re ronoje y lic e cu'an janipa rubi'tisim.

Ri Cristo lic xuya ranima' cutij c'ax kuma ri'oj. Jec'ula' ri', lic chirajawaxic che alak caya anima' alak catij alak c'ax ruma Rire. Ma e janipa ri caquiya canima' caqui'an ri utz tob cape c'ax paquiwi', k'alaj c'u ri' na e jinta chi puk'ab ri mac. Ruma c'u la', janipa chi k'ij e c'o che ruwachulew, na caqui'an ta chi janipa ri rayibal que ri winak, ma e caqui'an janipa ri caraj ri Dios.

We e c'o tzel quech'a't chi'ij alak ruma cojom alak rubi' ri Cristo, ri' lic nim k'ij alaxic alak ma ri chomilaj Ruxlabixel ri Dios c'o uc' alak. Katzij wi, e c'o ri tzel quech'a't chirij Rire, no'j ralak lic cayac alak uk'ij Rire.