وَ بَتَّانْ مَلَكْ آخَرْ جَاءْ وَرَاهُمْ وَ هُو الْمَلَكْ التَّالِتْ. وَ هُو كَلَّمْ بِحِسّ شَدِيدْ وَ قَالْ: «كَنْ نَادُمْ يَسْجُدْ لِلْحَيْوَانْ وَ صَنَمَهْ وَ يَقْبَلْ وَسِمْ فِي جَبْهِتَهْ أَوْ فِي إِيدَهْ، هُو يَشْرَبْ خَمَرْ، مَعَنَاتَهْ هُو يَلْقَى غَضَبْ اللّٰهْ. وَ الْخَمَرْ دَا، خَمَرْ تَقِيلْ بِلْحَيْن وَ مَصْبُوبْ فِي كَاسْ هَنَا الْعَذَابْ وَ النَّادُمْ الْيَشْرَبْ مِنَّهْ يِعَذُّبُوهْ بِنَارْ وَ كِبْرِيتْ قِدَّامْ الْمَلَائِكَةْ الْمُخَصَّصِينْ وَ قِدَّامْ الْحَمَلْ. وَ الدُّخَّانْ الْيَطْلَعْ مِنْ النَّارْ التِّعَذِّبْهُمْ دِي، هُو يَطْلَعْ دَايْماً وَ إِلَى الْأَبَدْ. وَ النَّاسْ الْيَسْجُدُوا لِلْحَيْوَانْ الْفَسِلْ وَ لِصَنَمَهْ وَ يَقْبَلَوْا وَسِمْ أُسْمَهْ مَا عِنْدُهُمْ جُمَّةْ وَ لَا لَيْل وَ لَا نَهَارْ.»