Popular Bible Verses from 1 بُطْرُس 4

Share

قُبَّالْ كُلَّ شَيّءْ، أَرَّايَدَوْا أَمْبَيْنَاتْكُو بِمَحَبَّةْ شَدِيدَةْ أَشَانْ الْعِنْدَهْ مَحَبَّةْ يِسَامِحْ زِيَادَةْ لِلنَّاسْ الْيَخْطَوْا فَوْقَهْ.

اللّٰهْ أَنْطَى أَيِّ نَادُمْ مِنْكُو قُدْرَةْ أَشَانْ يَخْدِمْ بَيْهَا لِأَخْوَانَهْ. وَ خَلِّي أَيِّ نَادُمْ يِشِيلْ مَسْؤُولِيّتَهْ فِي بَرَكَةْ اللّٰهْ الْقَاعِدَةْ تِسَوِّي أَمْبَيْنَاتْكُو خِدْمَةْ شِقْ شِقْ.

مَثَلاً، أَيِّ نَادُمْ الْيِكَلِّمْ لِلْأَخْوَانْ فِي الْمَلَمَّةْ، خَلِّي يِكَلِّمْ لَيْهُمْ بِكَلَامْ اللّٰهْ. وَ أَيِّ نَادُمْ الْيَخْدِمْ لِلْأَخْوَانْ، خَلِّي يَخْدِمْ بِالْقُدْرَةْ الْاللّٰهْ أَنْطَاهَا لَيَّهْ. أَشَانْ كُلَّ شَيّءْ التِّسَوُّوهْ يِمَجِّدْ اللّٰهْ بِوَاسِطَةْ عِيسَى الْمَسِيحْ. وَ لَيَّهْ هُو الْمَجْد وَ الْمُلُكْ دَايْماً وَ إِلَى الْأَبَدْ. آمِينْ.

وَ لَاكِنْ كَنْ يِتَعُّبُوهْ أَشَانْ هُو مَسِيحِي بَسْ، خَلِّي مَا يَخْجَلْ. فِي بَدَلَهْ، خَلِّي يِمَجِّدْ اللّٰهْ أَشَانْ النَّاسْ جَعَلَوْه نَادُمْ هَنَا الْمَسِيحْ.

كُمَالَةْ كُلَّ شَيّءْ قَرِيبْ. أَشَانْ دَا، خُطُّوا بَالْكُو وَ أَقْعُدُوا ثَابْتِينْ دَايْماً أَشَانْ تَقْدَرَوْا تِصَلُّوا فِي أَيِّ وَكِتْ.

يَا أَخْوَانِي النِّحِبُّكُو، مَا تِعَجُّبُوا مِنْ التَّعَبْ الشَّدِيدْ الْيَجِي فَوْقكُو أَشَانْ يِجَرِّبْكُو. مَا تُقُولُوا دَا شَيّءْ مَا مَعْرُوفْ جَاءْ فَوْقكُو. إِنْتُو قَاعِدِينْ تِشَارُكُوا فِي تَعَبْ الْمَسِيحْ وَ أَشَانْ دَا، أَفْرَحَوْا فِي أُسْط التَّعَبْ. وَ كَنْ شَارَكْتُوا فِي تَعَبْ الْمَسِيحْ دَا، تَفْرَحَوْا فَرْحَةْ شَدِيدَةْ وَكِتْ هُو يِبِينْ فِي مَجْدَهْ.

خَلِّي أَيِّ نَادُمْ مِنْكُو يِفَضِّلْ أَخْوَانَهْ الْيَجُوا لَيَّهْ وَ مَا يَشْكِي.

وَ بِمِثِلْ دَا، خَلِّي النَّاسْ الْيَتْعَبَوْا حَسَبْ الْاللّٰهْ يِدَوْرَهْ يِسَوُّوا دَايْماً الْخَيْر وَ يِتْوَكَّلَوْا عَلَيْ خَالِقْهُمْ الصَّادِقْ.

وَ بِمِثِلْ دَا، تَعَرْفُوا كَدَرْ الْمَسِيحْ لِقِي تَعَبْ فِي جِسْمَهْ. وَ قَوُّوا نُفُوسْكُو بِفِكِرْ مِثِلْ فِكْرَهْ أَشَانْ النَّادُمْ الْقِبِلْ تَعَبْ الْجِسِمْ خَلَّى مِنَّهْ الذُّنُوبْ. وَ هُو مَا يِدَوْر يِتَابِعْ شَهْوَةْ النَّاسْ بَتَّانْ، لَاكِنْ يِدَوْر يِتَابِعْ الْاللّٰهْ يِدَوْرَهْ طُولْ الْوَكِتْ الْفَضَّلْ لَيَّهْ فِي الدُّنْيَا.

كَنْ النَّاسْ يِعَيُّرُوكُو أَشَانْ إِنْتُو نَاسْ الْمَسِيحْ، خَلَاصْ عِنْدُكُو بَرَكَةْ أَشَانْ رُوحْ اللّٰهْ الْمَجِيدْ قَاعِدْ فَوْقكُو.