Popular Bible Verses from Tasniya 8

Share

Fakkuru fi Allah Ilaahku achaan hu bas al-antaaku al-gudra al-beeha ligiitu al-khuna di. Wa be da, lahaddi l-yoom hu akkad al-muʼaahada al-sawwaaha maʼa abbahaatku.

Wa Allah daʼʼafku be l-juuʼ wa baʼad da, akkalaaku al-manna wa la intu wa la juduudku ma taʼarfuuha min awwal. Wa da achaan yiʼarrifku kadar al-insaan ma yiʼiich be l-akil wiheedah laakin yiʼiich be kulli kilme al-yuguulha Allah.

Wa fakkuru fi l-derib al-waddaaku foogah Allah Ilaahku fi muddit 40 sana fi l-sahara le yidaʼʼifku. Wa da le yijarribku wa yaʼarif al-fi guluubku wa yichiif kan tahfado wasiiyaatah walla la.

Angarʼu, ma tuguulu fi guluubku : «Be juhudna wa gudrat duraaʼna aniina ligiina al-khuna di.»

Ahfado nufuusku wa ma tanso Allah Ilaahku lahaddi ma titabbugu al-wasaaya wa l-gawaaniin wa l-churuut al-ana Muusa nantiihum leeku al-yoom.

Wa aʼarfu tamaam wa khuttu fi guluubku kadar Allah Ilaahku yiʼaddibku misil naadum yiʼaddib wileedah.

Wa wakit taakulu wa tachbaʼo, tahmudu Allah Ilaahku fi chaan al-balad al-adiile al-antaaha leeku.

Wa ahfado wasaaya Allah Ilaahku achaan tamchu fi derbah wa takhaafo minnah.

Wa hu akkalaaku al-manna fi l-sahara al-abadan juduudku ma irfooha wa battaan jaab leeku al-duʼuf wa jarrabaaku wa fi l-akhiir, sawwa leeku al-kheer.

Wa da wakit taakulu wa tachbaʼo wa wakit tabnu buyuut adiiliin wa taskunu fooghum. Wa da wakit yikattir leeku bagarku wa khanamku wa dahabku wa fudditku wa kulla cheyy al-hanaaku. Fi l-wakit da, angarʼu ! Khalli guluubku ma yistakbaro wa tanso Allah Ilaahku al-maragaaku min Masir balad al-ubuudiiye.

Wa be da, Allah Ilaahku yiwaddiiku fi balad adiile al-indaha wudyaan wa uyuun almi wa almi al-yamrug min tihit al-ard wa yisiil fi l-kadaade wa l-jibaal. Wa di l-balad al-indaha gameh abyad wa gameh ahmar wa inab wa tiin wa rummaan wa dihin zaytuun wa asal. Wa fi l-balad di, taakulu khubza bala taʼab wa cheyy yigassir leeku kula ma fiih. Wa hujaar al-balad di induhum hadiid wa min jibaalha, tamurgu nahaas.

Wa Muusa gaal : Hassaʼ da, kulla l-wasaaya al-naamurku beehum al-yoom, ahfadoohum wa tabbuguuhum. Wa da achaan tahyo wa tabgo katiiriin wa Allah yiwaddiiku wa tichiilu warasa al-balad al-hu halaf yantiiha le juduudku.

Wa fi muddit al-arbaʼiin sana dool, khulgaanku ma gidmo leeku fi jilidku wa rijleeku kula ma wirmo.

Wa hu al-waddaaku fi l-sahara al-wasiiʼe wa l-mukhiife, al-indaha dabiib niiraani wa agaarib. Wa di balad al-atach al-ma yalgo foogha almi. Wa laakin hu marag leeku almi min al-hajar al-gawi.