Popular Bible Verses from Miq 4

Share

Atoob' ta re' taqe i tokoom tinamit re' taqe i kitiyoox neenkinimaj, Eh re' hoj xama' naa ta wo' qakanaam runimjiik i k'achlik Dios re' i QaJaaw.

Eh re' i tinamit, je' wili i naa kiq'orom: Kim taq qojohtoq chinaah i yuuq' i wilik wii' i rupaat i QaJaaw re' i ruDios i Jacob, reh chi nee ruk'uhtaaj qeh i rub'eeh, eh naaqak'am naah i nee ruq'or qeh, inko'q taqe. Ruum ar Sión naa reliik chaloq i ruk'uhb'aal i Dios, eh Jerusaleem naa reliik chaloq i ruq'oral.

Eh naa ruponiik i q'iij chi re' xti manlik i rupaat i QaJaaw Dios wilik chinaah i yuuq', re' re' q'e' naa ruwihiik runimaal wach chikiwach chu'nchel i yuuq' najt kinaah, eh ma' k'isiin i tinamit wilkeeb' sut i wach ak'al naa kojiik chi rilariik.

Re' i QaJaaw Dios naa ruq'atwiik i q'orik chikinaah i tinamit, eh naa ruq'ilim taqe i nimaq tinamit kow kiib', i wilkeeb' chi najt yuuq'. Eh re' kich'ihch' k'ul q'as naakisutem chi reh arado, re' i kich'ihch' q'as ju' macheet chik naakisutem wii'. Eh ma' jino'q chik i tinamit naakikansam kiib' ruuk' ch'ihch', ma' naa ta chik kitijiik reh i q'aq'inik.