Popular Bible Verses from Isa 41

Share

Je' re' noq matyo'jik taq, ruum re' hin wilkiin taq awuuk'. Maa rub'an taq kiib' ak'ux ruum re' hin, aaDios. Eh re' wo' hin kinye'wik taq akowiil, re' hin kintoob'inik taq aweh chi juneliik, ruuk' i runimaal i wajaawriik, eh naa taq kaat wilom.

Re' hin, hin taq aaWaJaaw aaDios, hat taq nuchopom ruuk' i rusak'aaj nuq'ab', je' wili i nuq'or taq aweh: Maayohb'isaj taq awiib', re' hin naa nutoob'iniik taq aweh.

Eh chu'nchel i ki-ixowanik taq awach naakik'uhtaam kik'ixb'ilaal, naa rehtesjiik i runimaal kiwach. Eh awach naq inkaaj kianam aweh naa rusachariik kiwach chi jumpech.

Re' hin xineesanik taq chaaweh pan tokoom tinamit wilkeeb' cho chi najt, je' wili i xnuq'or taq aweh: Re' taq i hat, hat taq waj kamanoom re' hin xin sik'wik taq chawach, ma' jaruuj taq naa kaat nuq'eb'em chi riij nuk'ux.

Re' taq i hat naa naq chik asik'im i ki-ixowanik taq awach i kichalik taq chi q'aq'inik awuuk' ma' naa ta chik areqem taqe. Je' cho xama' wilkeeb' ta wo' chi jumpech naa rub'anam.

Matyo'jik taq i hat, hat taq riih rumaam i Jacob, i ma' xta taq awajaawriik noq i nawik'raaj. Eh xama' hat ta taq k'ih chawiib', re' hin naa nutoob'iniik naa nuko'liniik taq aweh, hin taq aSantolaj Dios.

Eh re' taq i hat aj Israel, riih rumaam Jacob i hat taq waj kamanoom, nutinamiit nusik'im taq chaa wach, hat taq cho riih rumaam i wamigo Abraham.

Re' hin naa wesam taqe chaloq i nim ha' chupaam taqe i yuuq'. Eh chi naa raasjiik i k'achlik ha' wataq k'ixkaab', naa nusutem chi ha' paam ye'aab' i chiq yuuq'. Naa nusutem chi raasb'al ha' i chiqiij paam ak'al.

Eh re' taqe i neb'aa' i nooj naq kisik' kihaa', xama' inkireq ta wo' hoq, xa chiqiij naq chik kichii'. Eh re' hin naab'iram i kitiij, ma' naa ta taqe nukanaam chi kutkeel, ruum naa taqe nutoob'eem, ruum re' hin taq aaDios i hat taq aj Israel.

¿Awach imb'anik i re'? ¿Awach i xa wilik wo' chaloq i chinaah i wach ak'al rutihk'ik chee k'acharik? Re' imb'anik taqe reh i re', re' hin i jinaj chi Dios xa wilkiin wo' chaloq najtir q'iij xanaa wo' nuwihiik pantz'apaab' wach.

Eh naa nuye'em q'ab' chi naa rupoq'iik taqe chaloq i chee' chakaltee' chupaam i ye'aab' chiq yuuq'. Naa kipoq'iik i acacia, i wahut, i olivo, i chaj, i sohchaj, i bojes. Reh chi re' i tinamit neenkikoj rehtaal, chi neenkilow, chi neenkinab'eej, chi re' hin ximb'anik xin tz'uhkrisanik reh chu'nchel i re', hin aSantolaj Dios taq i hat, aj Israel, inki Dios.