Popular Bible Verses from 1 Juan 4

Share

Je' re' noq, awach i wilik k'axooj ruuk', ma' xta chik naaruyo'jiik wii', ruum re' i korik laj k'axooj i resaj i yo'jik. Re' yo'jik panti' k'axik ink'amwik. Ruum aj re', awach i konyo'jik, ma' xtaj i korik laj k'axooj ruuk'.

Hat taq kok' wak'uun noq wilkaat, yu'naak re' chik i Dios inehchanik taq aweh. Eh ma' xta taq xatkuchej taqe inkikoj kiib' chi Cristo re' re', ruum re' inehchanik taq aweh xiik' naah nimaal i rajaawriik chuwach inehchanik keh i tinamit yiib' wach kina'ojb'al.

Re' hoj inqak'ax i Dios, ruum re' reh k'axwik qeh chi peet.

Hat taq nuloq'laj hermano, k'ul taq qak'ax qiib' chi qawach, ruum re' k'axooj ruuk' i Dios inchalik. Awach ink'axwik, aasjinaq chik ruka'peech ruuk' i Dios, eh reht'al wach i Dios.

Awach i ma' xtaj i k'axooj ruuk' ma' reht'al ta wach i Dios, ruum re' Dios reh aj K'axool.

Je' wili noq wilik i qak'axariik xub'an i Dios: Ma' re' tee hoj xoj k'axwik reh chi peet. Re' la' reh xk'axwik qeh chi peet, ruum xutaq'aaj chaloq i Rak'uun, reh chi xuyeew riib' chi jilow mayiij reh chi xkuyarik chu'nchel i qamahk.

Hat taq nuloq'laj hermano, wila' je' re' qak'axariik xub'an i Dios, je' wo' chik re' i qa a'n i hoj: k'ul qak'ax qiib' chi qawach.

Re' qak'axariik xub'an i Dios ti xk'utinik noq xutaq'aaj cho wach ak'al i jinaj chi Rak'uun. Re' xraaj i reh chi parub'ihnaal i Rak'uun naaruwihiik qak'achariik chi juneliik.

¿Awach i ruq'or chi ruk'ax i Dios, eh i rixowaaj wach i ras ruchaaq', re' reh xa aj chukul q'orik. Wila' ma' ruk'ax i ras ruchaaq' k'ahchi' rilom wach, nik' wach noq neeruk'ax i Dios ma' k'ahchi' ta rilom wach?

Awach inq'orik rib'iral chi re' Jesucristo Rak'uun i Dios, re' i Dios wilik ruuk' eh re' reh ruuk' wo' Dios wilik.

Re' Jesucristo je' wili i k'uhb'aal ruq'orom qeh: Awach i korik chi ruk'ax i Dios, inchol wo' ruk'axam i ras ruchaaq', inki.

Hat taq nuhermano, ma' chu'nchel ta taq naa animam i kiq'orik chi re' i Ruxlab'al i Dios wilik kuuk'. Peet la' taq chawilow mi korik chi Ruxlab'al i Dios wilik kuuk', ruum ma' k'isiin chukul q'orik k'ahchi' kuktiik chaloq, re' tii chik i ruk'uhb'aal i Dios inkiq'or inki a'n kiib'. Ruuk' i wili nee taq inanab'eej awach i wilik i Ruxlab'al i Dios ruuk': Re' inq'orik rukorkiil chi re' Jesucristo xk'ulik chi ruwii' winaq ayu' wach ak'al, re' re' Ruxlab'al i Dios wilik ruuk'.

Eh awach inq'orik reh chi re' Jesucristo ma' xk'ulik ta chi ruwii' winaq ayu' wach ak'al, ma' re' taj Ruxlab'al i Dios wilik ruuk', re' la' i ruxlab'al i rukoj riib' chi Cristo wilik ruuk'. Re' taq i hat ab'iram taq chik chi naa ruk'uliik i loq, eh yu'naak wilik chik chi junsuut i wach ak'al.