Popular Bible Verses from Matius 6

Share

Daiki' manyariki' tajolo jalu manyuro' adariin lo'a kangkamanna Alatala. Manyariki' tio' tapaten di arona Alatala. Ka' bea idua'anga iki' gulungan kaparuluanka'.

Jaji ada'ki' kalangganganen lo'a soal mina'. Ti' soal mina', mina'la. Sukup mamin soal bagi aso di'en,” ingka kenang i Yesus lo'da'.

“Jaji kenang lalo jarumku' lo'in, ada'ki' kalanggangan mamikirang soal katio'anka', soal angkaan mainyum, soal parakainiin mantuarika'. Asi lo'a? Tio'ka' di'en okan soal jalu kaan poang yang pentingen. Mantuarika' di'en, okan kainen poang yang pentingen.

“Jaji daiki' ti' bado'a intamaki' lo'a kamarka'. Arung ikaput iki' mambanganka'. Inang bado'aka' lo'a Ama'ka' yang na'anen ikita. Baru'ki' dabalas kole'a Ama'ka' yang mangitaan, yang manamuun kausa jaluun.

"Jaji do'aka', kenang yang maamen, O Amanam di Surga, arung ipaduli asannu, arung ianggap barese. "Daiko kangkamannu dinen arung ipadari di dunia di'en. Awan lalo dalola'anina panamunu inang di Surga, arung awan dinen bea ilola'anina indi'angen di duniaan.

"Meangkam mairaso jalu kaanen.

"Kenang bea daikam di'en amponi dosanam awan bua daikam mamponinam lo'a tau arasala'en lo'am.

"Ada'kam iawaan lo'a jalu yang mangilalaien lo'am dinen. Panjao' lo'am dari i Pangabo, yang jalu ajau'en dinen. [Kole'a iko lalo yang mangkamen. Iko lalo yang tau bakuasaan. Iko lalo yang ipudiin sampai salaun-launna,]" ingka kenang.

“Kole'a daiki' ati'enki' mamponi tau yang arasala'en lo'ka', awan dinen bea damponina dinen daiki' kole'a Ama'ka'.

Belejo gulungan burungen, okan daia masak, okan daia matam mangapulungang ase di pamoranen. Angkaanna bua, dapangkaan bua kole'a Ama'ka'. Labina lagi' daiki', tentuki' baraga lo'a gulungan burungen.

“Jaji mangapulungang kamaamanka', na'an pande kamaamanka' dinen ikapulungang iki' di duniaan. Kole'a indi'angen mainya' dakaan tagaren, mainya' dakaan ulas, mainya' bea darampas dakalit tauna. Yang kamaamanka' dinen arung ikapulungang di Surga. Inang kosan tagar, kosan ulas angkaanen. Kosan tau marampas mangalit. Kole'a disa poang ikumpulanga iki' jaluun, tentu talola' bea ateka' lo'a dinen,” ingka kenang i Yesus lo'da'. "Ti' indi'ang di duniaan ikapulunga, indi'ang lapoang di arta duniaan ateka'. Dinen lapoang ipikirangen. Ti' inang di Surga ikapulunga, inang bea di Surga ateka'.

“Umpamana pangkam, na'an patut dua paraampuanna yang dalola'aniin. Na'an mainya'! Ati'en yang seraan dakasaang, tentu yang seraan dakalibakangen. Ati'en yang paraampuan sera dinen dalola'aniin, tentu yang sera dapebelang. Kenang bea daiki', ti' panamuna Alatala ipakaien iki', na'an patutki' tama' lolo to lo'a duiten padari ulunna, kole'a na'an sikule' panamu duaan dinen,” ingka kenang i Yesus lo'da'.

Padahal rimputen dinen jalu sikadang poang, aso di'en tio', mina' itampeang lo'a apiin. Jaji ati'en awan dinen maama parakainina lo'a gulungan rimputen kole'a Alatala, tentu labi lagi' mainya'a parakaini lo'ka'. Daikin saja kurang jaji kaparasaya'annin,” ingka kenang.

Daiki' pameangka' ada' datamu tauna. Arung dinen sama'a, mameang jaluka', tanganka' kayoko'en arung na'an datamu kole'a tanganka' katoen. Jaji ati'en awan dinen, ti' na'an datamu tau, baru' dabalas kole'a Ama'ka' yang datamuun kausa jaluun. Kenang ratina," ingka kenang i Yesus lo'da'.

"Jaji maam-maamkin. Na'an pande basa maamka' dinen itiang mala pudi. Ti' to' mala pudika' poang, kosan opa'ka' dameang kole'a Ama'ka' di Surga.

“Jaji daiki' ti'ki' bapuasa, ada' lindo'ka' ipola-pola susa, awan ira tau mamis baba'a masam atenaan. Daira dinen mainto' datamu tauna, mainto' dapaduli tau. Manjarumak lo'in tapat-tapat, kosan bapi balasanda'. Mamin ira manarima' pudi. Daiki' ti' to' bapuasa, arung rapi. Arung idinyaki dinen bukka'. Arung ikusuk lindo'ka', mainto' na'an datamu tau bapuasaka'. Baru'ki' to' dakita kole'a Ama'ka' yang na'anen ikita iki'. Baru'ki' dabalas,” ingka kenang i Yesus lo'da'.