Popular Bible Verses from Mat 6

Share

“Mɨro pəs kamiar tɨnakaiupan maitkoin niko taha Ughin ne nətuatuan iərəm rɨmsɨpən lan, kəni tɨpofɨna mɨn narɨmnar min pətɨm ɨk kəm kamiar.

“To nar ka, pəs nɨkimiar tɨrɨsho-ɨpɨkan nian təlauk, mɨro-in-ka nar taha nian təlauk in taha nian təlauk. Nɨtətan taha nian karena ravkɨr to nian am an.

“To nar ka, iakamɨni to kamiar məma nɨkimiar tɨrɨsho-ɨpɨkan nəmiuhan thəmiar, məma tɨnakarkɨn nəta mamarəmnɨm nəta, o nɨpəlakɨmiar, məma tɨnakarəviu kamiar lə nəta. Mɨro-in-ka nəmiuhan in nar asul mapitha naugɨnan, ne nɨpəlakɨtil in nar asul mapitha napən.

“Mɨro nian ik tɨnakəhuak, vɨn ima lə nima taham mharɨg lə tapən, kəni ka maməhuak kəm Rɨmɨm iərəm ramarɨk auniuan. Kəni ne Rɨmɨm iərəm ramap nar kamol auniuan tɨrɨpofɨna nɨrouan kəm ik lə nɨmrɨ nahuto.

“To nar ka, pəs kamiar tɨnakeihuak məkləlan. ‘Rɨmɨmar lə neai, Pəs takosit Nətɨgɨm. Pəs niko taham rɨva, Pəs nar Ik nakolkeike tɨpol lə tən kəma lə neai.

Ofa lə nian touek nar sakarkɨn touek

Mol ɨvt kamar to təvhaga tat thəmar, Mɨ-in-ka-ne kamar iakamarol ɨvt nərəmim to təvhaga tat kamarol kəm kamar.

Ɨseghənanin məma nofənofənan tɨros kamar, Mɨro evitha kamar to Setan. Mɨro-in-ka nərəmɨrean in taham, ne nɨsanənan, ne nɨvɨtan, Lə noua nuw min, Amen.’

“Mɨro-in-ka takəma nakamarol ɨvt nərəmim to təvhaga tat kamarol kəm kamiar, Rɨmɨmiar lə neai tɨrol ɨvt kamiar to təvhaga tat thəmiar.

“Aip ru nɨmənɨk min lə neai. Ilar kɨsaihiuan nar, mɨsaisɨman, mɨsaigrətinan naugɨnan apa ima, mɨro Rɨmɨmiar lə neai ramaugɨn ilar. ?Mɨro nɨsarhinatinan məma kamiar nakarɨvt maipitha nɨmənɨk?

“Tɨnɨsarosatinan nauta thəmiar lə tən ɨk, ikɨn kakros ne namtean kamuətakɨn nar, ne nakhɨla min kamhaipu nima məma takaikhɨla. “Mɨro pəs tɨnakarosatin nauta thəmiar lə neai, ikɨn kakros ne namtean to kɨsuətakɨnan nar, ne nakhɨla min to kɨshaipuan nima məma takaikhɨla. “Mɨro-in-ka pətɨvɨn ikɨn nauta taham rakamɨl ikɨn, nɨkim mɨn tɨrakamɨl ikɨn an.

“To iərəmim ker rɨsolatkokɨnan nar to iərəmɨra kiu. Mɨro-in-ka to rɨperhau ker mamolkeike ker, o to roatisɨg-ɨvtin ker mamol tanɨpɨn lə ker. To nɨsarhinatinan məma tɨnakarolatkokɨn nar kəm Ughin ne nauta taha tən ɨk.

“?Kəni ka, takəma Ughin raməviu ɨvt mealan nɨvhal əpnapɨn am lənkɨru, iərəm rakamɨl touek mɨro təlauk tɨpalakin lə nɨkəm, rɨtol nɨkimiar rakamho məma to rɨsəviuan kamiar? !Natətean thəmiar rɨsuas akɨn!

“Mɨro nian ik namofən nasituan kəm iərəm rouloul ker, tɨnɨseghənanin məma nəlɨmɨm mul tɨrhinatin nar nəlɨmɨm matu ramol, “məma nar ɨvt namol tɨnakol auniuan am. Kəni ka Rɨmɨm iərəm ramap nar kamol auniuan tɨrɨpofɨna nɨrouan kəm ik lə nɨmrɨ nahuto.

“Arsɨlatu kamiar məma nɨsarofənan nofənan thəmiar lə nɨmrɨ nərəmim, məma ilar takaip, tamo Rɨmɨmiar lə neai tɨrɨsofɨnean nɨrouan kəm kamiar ton.

“Nian nakamaipəs naugɨnan məma tɨnakeihuak, tɨnɨsarolan tɨkrɨ nərəm kamaivsit ilar, marol məma nɨmrɨmiar ramatite. Mɨro-in-ka ilar kamarol məma nɨmrɨnilar rɨtat, məma nərəmim takaip ilar məma kamaipəs naugɨnan to nəhuakan. Nɨpərhienan iakamɨni to kamiar, ilar kɨnaros itha nɨrouan thɨnilar. “Mɨro nian ik nakaməpəs naugɨnan məma tɨnakəhuak, pəs tɨnakaui nɨmrɨm mamol pomat lə thəmkapa, “məma nərəmim tɨsarhinatinan məma nakaməpəs naugɨnan to nəhuakan, mɨro Rɨmɨm iərəm ramarɨk auniuan, In pɨsɨn am tɨrhinatin. Kəni ka Rɨmɨm iərəm ramap nar kamol auniuan tɨrɨpofɨna nɨrouan kəm ik lə nɨmrɨ nahuto.