Popular Bible Verses from Abafilipi 2

Share

Murakhola likhuwa liosi khulwa obuyingani kata khulwa obwichinjimisiita; habula mwongolelanenje; buli mundu apaarenje mbu owashie noumushila. Murahenganga buli mundu khubindu bibie omwene ta, habula buli mundu khubiabashie.

Mubeetsenje nomwoyo mwinywe omulala nende okwenokwo okuli muKristo Yesu.

Ye yalinji khumela yaNyasaye; ne shiyapaarakhwo mbu okhuhelana nende Nyasaye nelikhuwa lilayi elia akhoyile okhuhandakhwo ta; ne yalekhuula kosi, niyeebukulila imela yomusumba, naba mukhufwana khwomundu. Ne olwa yalolekha mukhufwana khwomundu, yeetiitiyia omwene, niyeekhola omuhulili okhuula khukhufwa; toto, kata khukhufwa khwokhumusalaba.

Shichila Nyasaye niye oukholelanga mwinywe, akokhwenya nende akokhukhola khwosi, mutsiyemitsie tsindayi.

Ne niko akachila Nyasaye namwemekha hekulu, namuheelesia eliira elo elili ikulu khumeera kosi; mbu muliira liaYesu buli lisikamo lisikame, kata eliebili mwikulu, kata eliebili mushibala, kata eliebili musi weshibala, khandi mbu buli lulimi Iwiyame luri YESU KRISTO NIYE OMWAMI, khuluyali lwaNyasaye Samwana.

Kholenje kosi, oburabuutsuluula kata okhuyingana ta, mbu mubule eshiuku shiosi nimuba abeshiilongoole, abaana baNyasaye ababula imbala yosi mukari wabolwibulo olushiamu olurambaatsanu, omwa muloleshelangamwo shinga ebiashilo mushialo

Khulwako, abaheelwa banje, mubeetsenje abahulili, shinga olwa mubeetsanga; ne olwa emba nindiho lwonyene ta, habula okhushila muno bulaano, nihumaho. Inywe abeene, kholenje akakhoyeele obuhonia bweenywe, noburii nende okhutechela.