Popular Bible Verses from Hechos 20

Share

Anorã abiro ‘Marĩbasurupe padedenirã basoca bopacarare titamurõ bo’ ĩ mʉjãrẽ eñowʉ̃. Marĩ Nirũpʉ̃ Jesúcã ĩriarora abiro: «Apeyeno nʉnigʉ̃pe nʉnirẽrẽ ñegʉ̃sotoape ʉseagawi» ĩriguere wãcũnirã tairo tiro bo ―ĩ wedewi Pablo Éfeso macãrã Jesúre wedewõrã bʉtoare.

Atiere masĩcapeicã ya catiribʉrecorire maĩgʉ̃ wãcũpasʉtiheri. Buripe marĩ Nirũpʉ̃ Jesúcã yʉre dotiriguere tigʉ ‘Manigʉ̃ basoca nipetirare maĩwĩ’ ĩrẽ maquẽ docare ʉsearemena wedeyapaticorugaga.

Tairo tira mʉjãbasurupe came ñurõ ĩñanʉõña. Ĩñerõcã nipetira Jesúre wedewõribumacãrãcãrẽ ñurõ cote titamuña. Espíritu Santo mʉjãrẽ ‘ovejare coteribasocara abiro cʉ̃jãrẽ ĩñanʉõquetatuaro’ ĩgʉ̃ cũrĩgʉ niwĩ. Manigʉ̃ cʉ̃jãrẽna cʉ̃ macʉ̃ cõwõãgʉ̃ di cõãriguemena cʉ̃yara wañerõcã tirigʉ niwĩ.

”Yara, yʉ marĩcʉorore Manigʉ̃rẽ mʉjãrẽ wiyo cʉ̃cã ñurõ maĩrẽmena mʉjãrẽ cotearo ĩgʉ̃. Cʉ̃cã mʉjãrẽ bʉtoro maĩrẽ quetire wãcũrucũmocãña. Tie quetira tiecã tutuare cʉoremena cʉ̃rẽ wedewõrẽrẽ mʉjãrẽ õpemena wãcũtutuañerõcã tiroacu. Ĩñerõcã ãpẽrã cʉ̃yarare ‘abiro tigʉda’ cʉ̃cã ĩriarora abiro mʉjãrẽ cʉ̃jãmena ñurẽrẽ nʉnigʉagawi.