Popular Bible Verses from 1 Corintios 5

Share

Yʉ mʉjãrẽ ojacogʉ abirope ĩgʉ̃ tiwʉ “ĩcãrã mʉjãmena nirã Jesúre wedewõrã ña ĩcaperacãrã tidotihererena nomiãmena ñañarõ eperepirare, ãpẽrãyere bʉtoro borepirare, queore weriguerena wedewõrẽpirare, mequẽderepirare, ãpẽrãrẽ ñañarõ ĩdocaturepirare, yajarepirare icãta bapuherimocãña” ĩgʉ̃ tiwʉ. Tairora “cʉ̃jãnomenarẽ icãta ĩcãrõ yapãmaherimocãña” ĩ ojagʉ tiwʉ.

Tairo tira mʉjã ãpẽrãrẽ posori ĩrã cʉ̃ ñañarẽ tirecʉtigʉre panrẽ pumasãñerõcã tire bʉcʉniguẽrã abiro nigʉ̃rẽ cõãmocãña; judío basocacã Pascua bosebʉrecore tira panrẽ pumasãñerõcã tirere camejiaro manirõrã cõãmocã panrẽ mama tiriarora abiro. Mʉjã tora abiro panrẽ pumasãñerõcã tire bʉcʉniguẽrẽ cʉ̃jãcã cõãriarora abiro tira ñañarẽ tirecʉtirere cõãrã tiroacu; ñañarẽ manirãrã pʉtʉara eara tiroacu. Queorojoropʉare mʉjãpʉre tie panrẽ pumasãñerõcã tire manirõãcu; mʉjã pan mamarã abiro nirõãcu, merẽ Manigʉ̃rã ñawĩ mʉjãrẽ ñañarẽrẽ cosecõãgʉ̃rã abiro mʉjãcã ñañarẽ tirecʉtiriguere acõborigʉ, Jesucristore mʉjãcã wedewõrã eariasiro niñerõcã. Cʉ̃ Jesucristora marĩye ñañarẽ tirigue wapare cametʉogʉdagʉ cõwõãrigʉ niwĩ. Tairo tigʉ cʉ̃rã judío basocacã sʉgueripʉre Pascua bosebʉreco niñerõcãrẽ cʉ̃jãrẽ cʉ̃jãcã ñañarẽ tiriguere Manigʉ̃rẽ cõãrõ ĩrã ovejare sĩãriarora abiro sĩãyogʉ nigʉ̃ earigʉra ñawĩ.

Yʉ atibʉreco macãrã Manigʉ̃rẽ ĩñamasĩhera Jesúre wedewõribumacãrãwatoapʉ niherare cʉ̃jãcã ñañarẽ tirere icãta ĩñabesemasĩ, cʉ̃jãrẽ ñañarõ ti, wedequẽnomasĩheri. Mʉjãpe doca Jesúre wedewõribumacãrãwatoapʉ nirãrẽ no nirã mʉjãyarare ñañarẽrẽ tiñerõcã ĩñarã cʉ̃jãrẽ ĩñabesemasĩ, ñañarõ ti wedequẽnomasĩ. ¡Tie tairomerã ñarĩ quepa! Manigʉ̃basurupera cʉ̃rẽ ĩñamasĩherapʉare cʉ̃jãcã ñañarẽ tirecʉtiriguere ĩñabesegʉagawi. Tairo tira mʉjãpe Manigʉ̃ye wederucũrẽrẽ ojayoriapũpʉ ojayoriarora abiro tiya. Abiro ĩ: «ĩcʉ̃ mʉjãmenamacʉ̃ nigʉ̃ cʉ̃cã ñañarẽrẽ tiñerõcã ĩñarã cʉ̃rẽ cõãmocãña» ĩ ojayore ña. Tiere bira mʉjã mʉjãmena nigʉ̃rẽ cʉ̃ pacʉ nʉmorẽna ñañarõ tigʉre cõãwiocomocãña.