Popular Bible Verses from 1 Corintios 12

Share

Nipetira Jesúre wedewõrãcãrõrẽ Manigʉ̃ merĩãwãmerĩ wado timasĩrẽrẽ nʉniwĩ Espíritu Santore mʉjãmenarã ñawĩ ĩ eñogʉ̃. Tairo yawí cʉ̃cã tie timasĩrẽrẽ marĩrẽ nʉnirẽmenarã marĩ Jesúre wedewõrãbasurupere came ñurõ titamuãro ĩgʉ̃.

Mʉjãrẽ atiere abiro ĩgʉ̃ anorã abiro ĩrugagʉ ya. Marĩ nipetira Jesucristore wedewõrã cʉ̃ya ũpʉ̃ macãrãrã nirã ya. Tora abiro ninirã ĩcã ũpʉ̃ maquẽrã abiro marĩcã marĩcãrõ merĩã wado nicaperacãrã cʉ̃ya ũpʉ̃ macãrãrã nirã eara ya.

Ĩcãrõno marĩya ũpʉ̃ macãrõ ñañarõ posañerõcã ti ũpʉ̃ maquẽ nipetirepʉra ñañarõ posapetimocã o pũnirẽ tʉoiñapetimocã. Tairora ĩcãrõnorẽna ñurõ quenoñerõcãcãrẽ apeye nipetirepʉra ñurõ ʉsea tʉoiñapetimocã.

Ĩcãrãrẽ Manigʉ̃ cʉ̃ya Espíritu Santomenarã cʉ̃ye maquẽrẽ ñurõ masĩrẽmena wederucũmasĩrẽrẽ cʉora eañerõcã yawí. Tairora ãpẽrãrẽ Espíritu Santomenarã cʉ̃ye maquẽrẽ ñurõ pupea tʉomasĩrẽmena buemasĩrẽrẽ cʉora eañerõcã yawí. Ãpẽrãrẽ Espíritu Santomenarã ʉ̃sãrẽ “Manigʉ̃cã titamuñerõcãrã tiere timasĩrõãcu” ĩ wedewõmasĩrẽrẽ cʉora eañerõcã yawí. Ãpẽrãcãrẽ cʉ̃menarã diare cʉorare cʉ̃jãye pũnirĩguere cametʉomasĩrẽrẽ cʉora eañerõcã yawí. Tairora ãpẽrã tiẽñorẽrẽ timasĩrẽrẽ ñerã eawa. Ĩñerõcã ãpẽrã cʉ̃ Manigʉ̃cã wededotirere ñurõ wedemasĩrẽrẽ ñerã eawa. Ãpẽrãpe “ãnijã wãtĩ tutuaremena abiro yawa; ãnijãpe Espíritu Santoye tutuaremena abiro yawa” ĩ ĩñabesemasĩrẽrẽ ñerã eawa. Ãpẽrãcã ãpẽrãya basocaburi wederucũriʉserire wederucũmasĩrẽrẽ ñerã eawa. Tairora ãpẽrã basocaburi wederucũriʉserimena wederucũrẽrẽ “abiro ĩrugaro ya” ĩ wedemasĩrẽrẽ ñerã eawa.

Buri atie nipetire timasĩrẽre nʉnigʉ̃ Espíritu Santo wadora ñawĩ. Tairo tigʉ cʉ̃ wadora wedewõrãcãrõrẽ “atie timasĩrẽ cʉ̃rẽ ñuruga” ĩnigʉ̃ cʉ̃cã nʉnirugariwãmerã nʉnimasĩgʉ̃ ñawĩ.

Tairo tisiarigʉ niwĩ ĩcãũpʉ̃ macãrãrã abiro came bataherara ĩcãrõrã nimocã, came ñurõ titamurẽmenape nirucũmocãro ĩgʉ̃.

Manigʉ̃ye timasĩrẽrẽ Espíritu Santocã nʉnirẽ paje wãmerĩ nimocã. Buri atie nipetire Espíritu Santocã nʉnimasĩrẽ wadora ña. Marĩ Nirũpʉ̃ Jesucristore paje wãmerĩmena padedebosare nimocã. Buri cʉ̃ ĩcʉ̃ Nirũpʉ̃rẽna padedebosare nirõ ya cʉ̃ wadora cʉ̃rẽ wedewõrãrẽ merĩãwãme wado timasĩrẽrẽ nʉniriasiro niñerõcã. Marĩrẽ Manigʉ̃yere padedere ĩcãwãme niheri paje wãmerĩ nimocã. Buri marĩ nipetirapʉre cʉ̃ye tutuaremenarã tie nipetirere marĩpʉmenarã ñurõ timasĩñerõcã tigʉ cʉ̃ Manigʉ̃ wadora ñawĩ.

Manigʉ̃ Jesucristore wedewõrĩbu macãrã watoapʉre ãnijãrẽ niñerõcã borigʉ niwĩ: nisʉguerare Jesucristocã cʉ̃ye quetire buedotigʉ cũyoriarare; cʉ̃jãsirorena cʉ̃cã wededotirere wedeanarẽ; cʉ̃jãsiropere cʉ̃yere bueanarẽ; sirore tiẽñorẽrẽ tianarẽ; ãpẽrãrẽ diare cʉorare cametʉoanarẽ; ãpẽrãrẽ basocare titamuãnarẽ; dotiribasoca niãnarẽ ĩñerõcã basocaburi wederucũriʉserire wederucũãnarẽ niñerõcã borigʉ niwĩ.

Ĩcãũpʉ̃ maquẽ ĩcã wãmerã niheri paje nimocã.

Buripe doca abirope bi. Marĩya ũpʉ̃ maquẽrẽ marĩcã “tie tutuahere ña” ĩ ĩñarẽpera doca sotoape marĩcã bʉtoro boyorejorora nirõ ya.

Marĩya ũpʉ̃ cape wadora niñerõcãpʉare ¿dairo tinirã tʉoboyuri? Tairora marĩya ũpʉ̃ camupero wado niñerõcãcãrẽ ¿dairo tinirã wĩnimasĩboyuri? Queorojoropʉare Manigʉ̃ marĩya ũpʉ̃rĩrẽ tigʉ “topera cʉ̃jãrẽ queoro earoacu” ĩmasĩnigʉ̃ marĩye ũpʉ̃ maquẽrẽ to niãtiwãmerã turigʉ niwĩ. Nipetire marĩya ũpʉ̃ maquẽ nirẽno ĩcã wãmerã niñerõcãnopʉare ĩcãũpʉ̃no nirõ eamasĩheribogatiyu.