Popular Bible Verses from UMATEWU 6

Share

Kodwana funani qangi umbuswakhe nakho koke ukulunga kwakhe, nje-ke koke lokhu nakho nizakuphiwa khona.

Yeke ningakhathazeki ngelingomuso ngombana ilingomuso lizakukhathalela kwalo. Elinye nelinye ilanga lineenkathazo zalo ezaneleko.”

“Ngalokho-ke ngiyanitjela, ningakhathazeki ngepilwenu bona nizogomani namkha nizokuselani. Ningakhathazeki nangemizimbenu bona nizokwembathani. Kghani ipilo ayikaqakatheki khulu ukwedlula ukudla na? Nomzimba awukaqakatheki khulu kunezambatho na?

Kodwana wena nawuthandazako, ngena ngelawini lakho, uvale umnyango bese uthandaza kuYihlo ongabonwako. Nje-ke uYihlo obona lokho okwenziwa ngemsitheleni, uzakuvuza.

Nasi-ke indlela ekumele nithandaze ngayo, “ ‘Baba wethu osezulwini, alicwengiswe ibizo lakho, umbuso wakho awufike, intando yakho yenziwe ephasini njengombana kunjalo ezulwini.

Usiphe namhlanjesi isikwa sethu sangemihla.

Usilibalele amacalethu njengombana sibalibalela abanamacala kithi.

Ungasingenisi ekulingweni, kodwana yewusitjhaphulule kokumbi ngombana umbuso ungowakho, amandla nephazimulo ngokungapheliko. Amen.’

“Nanilibalela abantu abanitjhapheleko noYihlo osezulwini uzanilibalela.

Qalani, iinyoni zomkayi azitjali, azivuni namkha zibeke ngeenlulwini. Kodwana uYihlo osezulwini uyazondla. Alo, nina anikaqakatheki khulu kuneenyoni na?

“Ningazibekeli umnotho ephasinapha, lapha kunomvunya nokukhuna okurhayilako nalapha amasela afohla khona ebe. Kodwana zibekeleni umnotho ezulwini lapha umvunya nokukhuna kungeze kwarhayila khona nalapha amasela angeze afohla ebe ngombana lapha kunomnothwakho khona nehliziywakho ilapho.”

“Akakho ongasebenzela abaphathi ababili. Uzakuzonda omunye athande omunye namkha azinikele ngokupheleleko komunye bese unyaza omunye. Anikwazi-ke ukulotjha uZimu khibe ngapha nilotjhana noMamoni.”

Nakube uZimu wembesa utjani bommango obukhona namhlanjesi kusasa butjhiswe ngomlilo, akazunembesa ukwedlula, nina bokukholwa okuncani na?

Kodwana lokha nawupha abadududu, ungavumeli kobana isincele sakho sazi lokho okwenziwa sisidla sakho ukuze umnikelwakho ube sekusithekeni. Ngaleyondlela uYihlo obona ekusithekeni uzakuvuza.”

“Yelelani bona ningenzi izenzo zenu zokulunga phambi kwabantu kobana banibuke ngombana nanenza njalo, angekhe nawufumana umvuzo wenu ovela kuYihlo osezulwini.

“Nanizila ukudla, ningatjhitjhibalisi ubuso njengabazenzisi ngombana banyukubalisa ubuso babo ukubonisa abantu bonyana bazile ukudla. Ngiqinisile ngiyanitjela bona sele bamukele umvuzwabo ngokupheleleko. Kodwana wena nawuzilako, hlamba ubuso bakho, ukame iinhluthu zakho ukuze ungabonakali ebantwini kobana wena uzile ukudla, ngaphandle kwakaYihlo, ongabonwako. UYihlo obona okwenziwa ekusithekeni, uzakuvuza.”