Popular Bible Verses from اول پِطرُس 1

Share

مِوارک ووئه خِدا و اَمِه خِداوند عیسی مَسیحی پیر گه شی گَتِه رَحمَتی هَمرا، عیسی مسیحی زینِّه بَووئَنی طریق مِردِگونی جا، اَمارِه زینِّه اِمیدی سِه یَتِه تازه تولِّد هادا، و اِرثی گه از بِین نَشونِه و فاسد نَوونِه و بَپیس نَوونِه گه اونِه آسِمونی دِلِه شِمِنِه دارِنِه؛

شِما هینی خاطری خِیلی خِشالِنی، هر چَن مجبور بَوِنی گه یه مدتِ کِتاه جورواجورِ آزمودهایی دِلِه غم و غِرصه ای جا پِر بَووئین، تا شِمِه ایمونی اصالت آزمودی دِلِه ثابت بَوو، و هون روز گه عیسی مَسیح ظهور کِنِّه حمد و ثنا و جلال و احترامی باعث بَوو، هَمون ایمون گه طِلایی جا خِیلی بااِرزِشترِ گه هر چَن از بِین شونِه، ولی تَشی هَمرا آزمود وونِه.

ولی همون گه شِمارِ بَخونِسِه، قُدوسِ، شِما هَم دِشتِه شی رفتار و کِرداری دِلِه مِقَدَّس ووئین؛ چون توراتی دِلِه بَنوِشت بَوِه: «مِقَدَّس ووئین، چون مِن قُدّوسمِه.»

هِتی هون مطیعِ وَچیلِه ای تَرا، هون هوا و هَوَسایی تَرا نَووئین گه نادونی ای دورانی دِلِه داشتِنی

پَس شی فِکرارِ اَنجام هادائنی سِه حاضِر هاکِنین، و هوشیار ووئین، و شِمِه اِمید کامِلاً هون فیضی سَر دَوو گه عیسی مَسیحی ظهوری موقِه شِمارِ هادا وونِه.

چون، «دِشتِه جِسم هِتی واشی تَرائه و دِشتِه وی جلال واشی گُلی تَرائه؛ واش خِشک وونِه و وی گُلیشون کَلِنِه، ولی خِداوندی کلام تا اَبَد بِجا مونِّه.» و هَین کلام، هون خِبِ خَوَرِخِشِ گه شِمارِ اعلام بَوِه.