Popular Bible Verses from 1 Juan 4

Share

Awan ti kahalo a ánteng u págmahal, dipo u tatahoden a págmahal ay ibutan na u atanan a ánteng. Kanya ni deya man u manteng ay awan palla nikuna u tatahoden a págmahal. Dipo u ánteng ay kaguman nu parusa.

Anak ko hide, kao kamon nu Diyos sakay napagtagumpayan moy dán u liwat hide a prupeta. Dipo u Ispirito a katoy nikam ay mas makapangyariyan nan u ispirito a katoy ti munduway.

Magmahal kitam dipo u Diyos u dipalongo a nagmahal nikitam.

Mahal ko hide a kákkapatkákka, magmahalan kitam dipo gábwat tu Diyos u págmahal. U magmahal tu kapatkákka na ay anak nu Diyos sakay tumengge tu Diyos.

U awan magmahal ay awan tumenggi tu Diyos, dipo u Diyos ay págmahal.

Iye u tatahoden a págmahal: bakán a minahal tam u Diyos, nan hikitam u minahal na. Iye u dahilan kanya na he a pinaangay u Anak na tánni magin alay para tu kapatawaden nu kasalanan tam hide.

Mahal ko hide a kákkapatkákka, dipo konna hod ti kadakál u págmahal nikitam nu Diyos, dapat magmahalan kitam be.

Impeta dán nu Diyos u págmahal na nikitam nikuna pinaangay na u kaessa-essa na a Anak ti munduwáy tánni magkahod kitam ti biyag a awan ti kahád tu pamamag-itan na.

Ni ti deya man u magkagi a “Mahal ko u Diyos” pero maiyamut labe tu kapatkákka na ay mabule. Dipo ni u kapatkákka na a ketan na dán ay awan na pa mamahal, kodya na a mamahal u Diyos a awan na ketan?

U mángpahayag a ti Jesus ay Anak nu Diyos ay katoy tu Diyos sakay katoy be nikuna u Diyos.

Sa iye u utus a inyatád nikitam ni Cristo: ni ti deya man u magmahal tu Diyos ay dapat be a magmahal tu kapatkákka na.

Mahal ko a kákkapatkákka, dyan moy paniwalaan u balang magkagi a katoy nide u Ispirito nu Diyos. Nan subukán moy pa hide ni talaga a gábwat tu Diyos u Ispirito a katoy nide. Dipo makpal dán a liwat a prupeta ti munduwáy. Iye u pakatukuyan tam ni u Ispirito ngane nu Diyos u katoy nide: Ni kagiyan de a nagin tolay ti Jesu-Cristo.

Pero u awan magkagi ti konna hod tungkul ni Jesus ay awan nikuna u Banal a Ispirito nan u ispirito nu kontara ni Cristo u katoy nide. Nasaneg moy a pademát u kontara ni Cristo ti munduwáy sakay nadid ay atoy dán.