Popular Bible Verses from Petran ezmäine kirjeine 2

Share

No tö olet valitud rod, suren kunigahan papkund, pühä rahvaz, Jumalan ičeze rahvaz, i teid pandihe sanelemha hänen suriden tegoiden polhe, hänen, ken om kucnu teid pimedaspäi ičeze čudosižehe päivänvauktaha.

Hän libuti meiden grähkäd ičeze hibjas ristha, miše mö oližim kuti kolnuded grähkiden täht i eläižim tozioiktusen täht. Hänen kibedoil tö olet tehnus tervhikš. Tö olit kut segoinuded lambhad [paimneta], a nügüd՚ tö olet pördnus teiden hengiden Paimnennoks da Kacujannoks.

Ende tö et olnugoi rahvaz, no nügüd՚ tö olet Jumalan rahvaz. Ende tö olit Jumalan armoita, no nügüd՚ hän om armahtanu teid.

Kut vaiše sündnuded lapsed, tahtoigat puhtast hengelišt maidod, miše sil kazda da sada päzutandan.

Minä pakičen teid, kal՚hed velled, ked elät tulijoiden kartte verhas mas: algat antkoi valdad hibjan himoile, kudambad toradaba hengenke. Elägat hüvin Jumalad tundmatomiden rahvahiden keskes, i hot՚ hö erašti lajiškandeba teid kuti pahantegijoid, no konz nägištaba teiden azjoid, ka zavodiba ülenzoitta Jumalad sil päiväl, konz hän tuleb sudimaha mirud.

Eläbin kivin pangat ičtatoi hengeližen pertin sauvondaha, miše tehtas pühäks papkundaks da zavodida toda Jumalale hengeližid žertvoid. Ned oma hänele mel՚he Iisusan Hristosan täht.

Sikš tackat polhe kaik pahuz՚ da manitelend, algat heitelgoiš parembikš, algat kadehtigoi toižiden hüväd, algat pagiškoi pahad toižiden polhe.

Tulgat hänennoks, eläban kivennoks, kudamban mehed oma lükäidanuded, no kudamban om valičenu Jumal da kudamb om hänele kalliž.

Tö olet valdal, no üks՚kaik necil valdal algat tehkoi pahad, a elägat Jumalan käsköiden mödhe.

Ved՚ nece om Jumalan taht, miše tö hüvil azjoil lopenzoitaižit el՚getoman rahvahan meletomid paginoid.