Popular Bible Verses from Los Hechos 17

Share

Saa i̱kan Ndioxi chi kúni ra ná nduku yo ra, chi köo uꞌvi niꞌi yo ra vani kuekuee ná kaka ndaꞌa yo nduku yo ra, ta niꞌi va yo ra, chi köo íyo xíka ra, yati ni va íyo ra nuu íyo iin iin yo.

’Mií Ndioxi ikán ku ra si̱kuaꞌa taa núnu̱ú, saa ku̱u nuu xi̱koo taa nuu xiꞌin seꞌe ra tin seꞌe ñani ra, ta tixin na ikán ka̱ku tu yo va. Ñaa xi̱koo ndiꞌi yo ñuu ivi yóꞌó. Ta chi̱tuni Ndioxi ya koo yo ndiꞌi kúu ñuu ivi, ñaa chi̱tuni ra ndá ñaꞌñu ku nuu koo iin iin yo ta ndisaa kuiya koo yo ñuu ivi yóꞌó.

’Suvi Ndioxi ikán ku ra si̱kuaꞌa ñuu ivi xiꞌin ndiꞌi ka ñaꞌa ya íyo ñuu ivi yóꞌó. Ta suvi mií ra ku ra xáꞌnda chiñu nuu ndiꞌi ya íyo nuu ndivi xiꞌin ya íyo ñuu ivi yóꞌó. Ta köo íyo ra veꞌe ñuꞌu ya síkuaꞌa na ivi.

Chi Ndioxi ta xa ndi̱kaxin ra Jesús, Seꞌe ra ya kixi ra iin kivi ya xaa nani ra kuachi xiꞌin ndiꞌi na ñuu ivi, ta nina xiꞌin ya ndaa ikan ra saa xiꞌin na. Chi Ndioxi ta̱xi ra xi̱ni ndiꞌi na ñuu ivi tá kivi si̱taku ra Jesús tañu na ndíi ―káchi ra Pablo xiꞌin na.

Tá tu seꞌe Ndioxi ku ndiꞌi yo ta köo xíniñuꞌu yo ndikani ini yo ya káa Ndioxi tá káa iin ñaꞌa ya síkuaꞌa na xiꞌin kàà án xiꞌin yu̱ú án xiꞌin itun, köo xíniñuꞌu yo nduku xiní yo ndá kuꞌva káa Ndioxi.