Popular Bible Verses from Roma 10

Share

Roonamo ande uʼakuia tee ngangamiu ande o Isa Al Masi sumai satotuuna o Kawasana Opu, tee uparacaeaia i nuncana ngangarandamiu ande o Aulataʼala padhamo apadhadhi pendua Al Masi minaaka i mate, tee mboo sumai ingkomiu bheutopasalaamati.

Roonamo wakutuuna o giu incia sumai taparacaeaia i nuncana ngangarandata, ingkita tatopabanara i aroana Aulataʼala. Tee wakutuuna tatotuu-totuu tamangaku tamembali mia moosena Al Masi, ingkita bhetatopasalaamati.

Jadi o kaparacaeana manga mia aumba minaaka i porangona, tee opea irangona aumba alaloi mia mopakoleleakana lelena Al Masi.

Tee i nuncana Kitabi Momangkilo atoburi mboo sii, "Incema-incema moparacaeana tee Incia, inda bheatopekaea." Firimani incia sumai to bhari-bharia maanusia, malape miana Yahudi atawa o mia inda motolentuna miana Yahudi. Roonamo tangkanamo sakaro-karona o Aulataʼala momembalina Kawasana Opuna bhari-bharia mia tee ataralabhi-labhi mpuu adhawuaka kabarakatina to manga mia moemanina katulungina. "Rampaakanamo sumai, bhari-bharia mia moemanina katulungi i Kawasana Opu bheatopasalaamati."

Tuaapa amembali manga mia apakoleleaka lelena ande inda atolamboko? Mboomo mopadhana motoburina i nuncana Kitabi Momangkilo, "Amakesa mpuu o umbaana manga mia mobhawana lele malape minaaka i Aulataʼala!"

Maka tuaapa manga incia amembali aemani tulungi i Kawasana Opu ande manga incia inda aparacaeaia? Tuaapa manga incia aparacaeaia ande manga incia indapo arango lelena? Tuaapa manga incia arango lelena ande inda dhaangia manga mia mopakoleleakea?

Sainamo tujuana kapadhaana Hukumuna Taurati sumai satotuuna o Al Masi, sabutuna o kabanara apotibhaakea bhari-bharia mia moparacaeaia.