Popular Bible Verses from Mafulûlo 12

Share

Abo bene wîrhu bàmuhimire n’omukò gw’Omwâna-buzi n’oluderho lw’obuhamîrize bwâbo, barhanababaliraga amagala gâbo kuhika okufà.

Nanaciyumva izù linene emalunga, mpu: «Lêro obucire, n’obuhashe, n’obwâmi bwa Nyamuzinda wîrhu, n’oburhegesi bwa Kristu wâge bwamâyisha! Bulya olya okaz’ishobeka bene wîrhu, olyâla wakazâg’ibashobeka bwacà bwayira emunda Nyamuzinda wîrhu ali, ajirage ajugucirwa!

Olya wankuba-joka munênênè. olya mujoka wa mîra, olya baderha mpu yo Ndyâlya, mpu ye Shetani, olyâla ohabula rubanda, bamukwêba oku igulu, bamukulikiza na Bamalahika bâge.

Sîmagi, mwe malunga, n’abammubâmwo! We igulu, nâwe we nyanja, mwamahera, bulya erya Ndyâlya emwinyu yayandagalîre, erhi enakunîre bwenêne, kulya kubà emanyire oku ensiku zâyo ziri nganje».

Okubundi entambala yanacizûka emalunga: Mikaheri bo na Bamalahika bâge balwîsa enkuba-joka. Wankuba-joka naye amera omu muherho boshi na Bamalahika bâge.

Wankuba-joka anacilubira nyamukazi, akanya, aj’ilwîsa abarhengaga omu nda yâge bâli basigîre, balya bashimba amarhegeko ga Nyamuzinda, banagwêrhe obuhamîrizi bwa Yezu.

Okuhandi ecimanyîso cirhali cinyi caboneka emalunga; omukazi oyambîrhe izûba, n’omwêzi aha magulu gâge, n’ecimanè ca nyenyêzi ikumi n’ibiri omu irhwe lyâge. Ali nda, adwîrhe ayâma erhi mikero erhuma n’amalumwa g’okuburha.

Nyamukazi anaciburha omwâna w’oburhabana, ye wayish’iyâbula amashanja goshi n’ehirhi by’ecûma; nyamwâna banacimuka­nyanya, bamuhêka hali Nyamuzinda n’aha ntebe yâge. Nyamukazi yêhe ayâkira omu irungu, ashanga Nyamuzinda amurheganyîzemwo aha abêra, mpu bamuhêreho eci alya nsiku cihumbi na magana abiri na makumi gali-ndarhu.

N’ecindi cimanyîso caboneka emalunga; nkuba­-joka nnênênè eshushire isêsè, ya marhwe nda na mahembe ikumi, na mashungwè nda oku marhwe gâyo. N’omucira gwâyo gwayisha gwabulula ecihimbi ca kasharhu c’enyenyêzi z’omu malunga, gwanazikwêba oku igulu. Erya nkuba-joka yayîmanga embere z’olya mukazi wali buburha, yalinga mpu hano abà amâburha emulye omwâna.

Banacihà nyamukazi byûbi bibiri bya nyunda mpu abalalire omu irungu halya hâge anabêra, mpu bamuhêmbereho kasanzi n’orhusanzi n’oluhande lw’akasanzi, kulî na wanjoka. Wanjoka anacimeshera amîshi gali nka lwîshi, aganîkakwo nyamukazi, mpu olwîshi lumuhêke. Ci igulu lyafungira nyamukazi, lyayâshama, lyamirangusa lulya lwîshi wankuba-joka amesheraga kurhenga ekanwa kâge.