Popular Bible Verses from 1 Pita 4

Share

Ba isa sa poreveveina jola sa mu vaneqia na toa vairoqu, ura na tinoni sa vairoqu sa sa boka doro vajola pale sa na sela tana goto tinoni.

Gita doru sa taqe okoto teku vaivana tana Tamasa ko tavaroiti vataleria sira na vaivana pira ko ta tokaniria na goto tinoni.

Isa na tinoni sa tarae sa mi taraenia sa na paranga sosotona tana Tamasa. Isa na tinoni sa vaitokai sa mi vaitokai tugu sisa pana neqi sa vania na Tamasa. Ko vei pira mai vevei sira na uana tamugou poni sa mina tavatarasae sa na Tamasa pana miu kole kame tai Jisu Karisito. Na Tamasa sa pada ko mina tavatarasae, ura isa tugu sa isongia sa na neqi kamua na kamua. Agua.

Ba vei bu gosoro tapata sagou pana ginuana qu tutia na Karisito, poni sa muke keania agou sa vei isa. Goto tonai sa mu paranga jongana lao tu sa tana Tamasa pana ginugua vei qu somana pogosia agou sa na isongona na Karisito.

Ego sa tei rijo tata lame tu sa na vinabetona na kasia gusu ko mu gaiti vatalea na roqumiu beto mu suvere kopu ko mu boka vavara vatale.

Ka visa baere jonga, muke siboro beto na ruraniria sira na vitigi mamanginidi qu gosororia. Muke dogoro veiniria qai kamu goborogou sira na tapata qai lame podekia na miu rarange. Ba mu qerania tu agou sa na ginuana qu somana gosororia sira na vitigi sa gosororia na Karisito. Mu qera ko mu boka tavapugelenia agou sa na qeqera lavata tonai mina tabata sa na neqi lavatana tana.

Mu vakamu vataleria na goto tinoni beto muke ququminiria.

Ko sa vei sa ira na tinoni qai gosoro tapata pana ginuana qai tutia na nyorogua tana Tamasa sa mai totoravusia ira sa isa sa vapodakaria ko mai vania isa sa dorudi na dia toa. Ko mai vatadogoronia ira na tinoni vevei inara pana dia roiti sa na dia totoravusu tana, ura isa sake boka tetea na ona taringunguti.

Na Karisito sa tei gosoria tu na vitigi pa korosi, ko agou ba mu vanaqitinia ko mu gigila vatalea sa api: na tinoni sa gosoria na vitigi pa tini sa sa tei dainiaona tu sa na sela. Ko na tinoni vevei isa sake tutia sa na ona nyorogua ikikerena mekana, goto pana doruna na ona toa pa peso sa toania gu sa isa vei sa nyoroguania na Tamasa.

Qu tamana sagou tonai qu tapoja kokomiti pana ginuana qu vasosotoa agou sa na isongona na Karisito. Ura tonai qai veinigou inara, poni sa na Gagala neqina jola tana Tamasa sa kole somana pana tamugou.