Popular Bible Verses from Yihokora 12

Share

Nawo hana mu witha pamanyinga ghoNdjwighana nopaman̂ando ghomanongweneno ghawo, no mbadi ha hakire moyo wawo kate kukufa.

Ko kuyuva kwange diywi dyodikuru mudiwiru dyokuninga eshi: “N̂anyin̂anyi, runa kara ruvigha no ngcamu no ghufumu yaNyambi wetu. No marawero ghaKristusi wendi. Yoyishi muheti wawetu ne ghana pu kuwitha. Oyu gha wa heta kughutho waNyambi wetu mutenya no ghuthiku.

Dikongoro dishokuru dya pwire kuwitha, dikuruyoka edi ha toyire eshi Shadipinyi ngambi Shatani, oyu gha pemukithire kaye kokahe. Ghapwire kuwitha pamuve pofotji nawaengeli wendi.

Yodigho ghushamberere ghomawiru nawa ha tunga mo. Mu koneke mwe mwa tunga pamuve nomudikuruviya. Yoyishi, Shatani ghana shuruka kukwenu nonyinya dhishokuru, yoyi ghana dimuka eshi nako dhendi ne dhimbiru.”

Mudiwiru mweman̂anyine yita yaMishaghere nawaengeli wendi, kwadikongoro. Dikongoro, nawaengeli wadyo, nadyo dyeman̂anyine.

Ko kupaka dikongoro nyinya dhodhikuru kwamukamadi. Ha di yendi di ka tende yita nawanahoka wendi hamweya awa ha pungurire miragho dhaNyambi no kukwata manongweneno ghaJesus Kristusi.

Mudiwiru mwa hokokire thidimukitho thothikuru eshi: Mukamadi yu gha pwire kuyenga nodiyuwa nokaghonda kwishi dhomapadhi ghendi. Kumutwi wendi ne n̂ata dhomatungwedi dikumi nomawadi. Gha karire muremu no gha kughererire thikuma, mukupwedhangera kukushamuruka kwendi.

Ha shamuruka mwana ghokatughuru, oyu gha konine kuraghura marudhi ghomahe nomutagha ghothikuvo. Ene mwanuke ha mu yeyura nofuma kwaNyambi no kudipuna dyendi. Na mukamadi gha tjirerire kumamboreya, oku gha mu roghetherire Nyambi dyango eshi gha ka kuhoreke mo, mayuwa diyovi no mathere mawadi no makumi kwoko nodyofotji.

Ko kuhokoka mudiwiru thidimukitho thimweya. Pa karire dikongoro dyokwekeshera yira mudiro. Adyo dya karire nomitwi kwoko nodhiwadi nonyigha dikumi. Pa kehe mutwi ne n̂ata. Muthira wadyo dya kokire ditungwedhi dyoghuhatu no kudivukumena pamuve. Dikongoro dyemanine pepi namukamadi yu gha karire mumashamurukera eshi, di mine mwanendi.

Ene mando mawadi ghathipungu, ha gha pire mukamadi eshi, gha kone kutjira wangu no kutuka kumamboreya kudyango dyendi gha konde. Maghana sho thi mumone thiyoka munako no mumanako ghodihenda. Thiyoka tha thipagherire mate munyima dhamukamadi, yira rware rokupoposha eshi ru mine mukamadi. Muve ne wa ghamwenine mukamadi, pakuyandhuruka kanwa kagho no kumina rware, oru rwa shwaghire mukanwa kadikongoro.