Popular Bible Verses from Гъуазэхэр 7

Share

– ЗэолӀ бащэ уигъус, – Зиусхьаным ГъыдыӀон къыриӀуагъ. – Мыдианхэм ахэр атезгъэкӀощтхэп, армырмэ Израилым ежь текӀоныгъэр къыдихыгъэу ылъытэнышъ, сапашъхьэ зыщигъэпэгэщт.

Арыти: – А елъыпӀырэ зэолӀ шъищымкӀэ Сэ шъхьафит шъусшӀынышъ, – къыриӀуагъ Зиусхьаным ГъыдыӀон, – мыдианхэри шъуӀэ къислъхьащтых. Адрэхэр зэкӀэ ядэжь орэкӀожьых.

ЯӀу зэолӀэу уигъусэхэм: «Хэтми щынэу, зыгу пысысыхьэрэ пстэуми ГъылыӀад къушъхьэр къарэгъани, ядэжь орэкӀожьых». Арыти, нэбгырэ мин тӀокӀырэ тӀурэр кӀожьи, минипшӀыр къэнагъ.

Ау Зиусхьаным етӀани ГъыдыӀон къыриӀуагъ: – Джыри зэолӀ бащэ къэнагъ. ЗэкӀэри псым щэхи, Сэ ахэр ащ дэжьым къыщыхэсхыщтых. «Мыр уигъусэу къыбдэкӀощт» зыфасӀорэр къэбгъэнэщт, «Мыр къыбдэкӀощтэп» зыфасӀорэр, гъусэ хъущтэп.

Арыти, ГъыдыӀон зэолӀхэр псым рищэлӀагъэх. Джащ дэжьым Зиусхьаным ащ къыщыриӀуагъ: – Псым, хьэм фэдэу, елъыпӀхэмрэ, лъэгонджэмышъхьэкӀэ етӀысэхыгъэхэу ешъохэрэмрэ бгъу зырыз гъэуцух. ЗэолӀ шъищыр псым елъыпӀыщтыгъэх, адрэ къэнагъэхэр лъэгонджэмышъхьэкӀэ етӀысэхыгъэу, ӀэгукӀэ жэм фахьызэ, псым ешъощтыгъэх.